АҚШ аҳолисини коронавирусга қарши эмлаш кампанияси 11 декабрда бошланиши мумкин. Бу ҳақда АҚШ президентининг вакцина ишлаб чиқиш бўйича маслаҳатчиси Монсеф Слауи CNN’га маълум қилди, деб ёзади «РБК».
Унинг айтишича, Pfizer компанияси Озиқ-овқатлар ва дорилар сифати устидан санитар назорат бошқармаси (FDA)да ўз вакцинасидан фавқулодда вазиятларда фойдаланиш учун рўйхатдан ўтказишга ариза берди. Шу масала юзасидан йиғилиш 10 декабрга белгиланган.
«Биз дори маъқулланганидан кейин 24 соат ичида эмлаш пунктларига вакциналар партияларини юборишни бошламоқчимиз, шу сабабли, маъқулланганидан кейин бир ёки икки кун ўтиб, 11 ёки 12 декабрда эмлаш бошланса керак, деб тахмин қиляпман», — деди Слауи.
У, шунингдек, одамлар вакцинанинг самарадорлигига шубҳа қилишни бас қилишига умид билдирди. Слауининг фикрича, кўпчилик FDA томонидан белгиланган «дори самарадорлигининг минимал зарур даражаси» (50%) кўрсаткичини нотўғри тушуниб, буни вакцинанинг самарадорлик даражаси деб ўйлаган.
«Аслида бу 95%. Бу пандемиядан деярли тўлиқ ҳимоя. Бу одамларнинг тушунчасини ўзгартиради деб умид қиламан», — деди Слауи.
АҚШнинг Pfizer компанияси Германиянинг BioNTech компанияси билан биргаликда ишлаб чиқарилган COVID-19’га қарши вакцинанинг самарадорлиги 95 фоизни ташкил этишини маълум қилди. Компания маълумотларига кўра, вакцина синовда қатнашаётган кишининг ёши, ирқи ва миллатидан қатъи назар, самарали бўлган. Дастлабки синов натижалари 90 фоиз самарадорликни кўрсатганди.
Шунингдек, ноябрь ойида Американинг Moderna компанияси ўзининг янги коронавирусга қарши вакцинаси синовларнинг учинчи босқичида 94,5 фоиз самарадорлик кўрсатгани ҳақида хабар берди. Россиянинг «Sputnik V» вакцинасини ишлаб чиқарувчилар эса ўзларининг вакцинаси самарадорлигини 92 фоизга баҳолади.
Изоҳ (0)