Жанубий Корея ҳукумати 24 ноябрдан Сеулда коронавирус тарқалишига қарши чораларни кучайтиради. Бу ҳақда мамлакат соғлиқни сақлаш вазирлиги сайтида хабар берилди, деб ёзади «РБК». Республикада кетма-кет беш кундан буён COVID-19’га чалиниш билан боғлиқ 300 дан ортиқ ҳолат қайд этилмоқда, улардан 200 дан ортиғи — пойтахт минтақасига тўғри келади.
Қарор мактаб ўқувчилари томонидан 3 декабрда топшириладиган давлат имтиҳони арафасида қабул қилинди.
Пойтахт минтақаси аҳолисига битта жойга 100 дан ортиқ одамнинг тўпланиши тақиқланади. Клублар, барлар, караоке-заллар ва бошқа тунги муассасалар ёпилиши керак.
Ресторанлар 21:00 гача очиқ бўлади, шундан кейин фақат уйга олиб кетиш учун ишлайди. Кафелар эса егулик ва ичимликларни уйга олиб кетиш учунгина ишлайди. Фитнес-марказлар ҳам 21:00 дан кейин ёпилади, залда ҳар бир одам учун 4 м² майдон бўлиши керак.
Давлат компаниялари масофадан ишлашга қайтади, хусусий корхоналарга ҳам ходимларини масофадан ишлашга ўтказиш тавсия этилади.
Муассасалар ташрифчиларни рўйхатга киритиши керак, ёпиқ иншоотларда ниқоб режими мажбурий.
22 ноябрь куни Корея Республикасида бир кеча-кундузда 302 кишида коронавирус аниқланди, касалланганларнинг умумий сони 30 733 кишига етди.
Эслатиб ўтамиз, Сеул, Инчхон ва Кёнгидо шаҳарлари жойлашган Сеулнинг пойтахт минтақасида коронавирус инфекциясининг учинчи тўлқини бошланди. Шу муносабат билан мамлакат бош вазири Чон Се Гюн фуқаролардан оммавий тадбирлар ўтказишдан, шу жумладан, очиқ ҳаводаги тадбирлардан ҳам тийилишни сўради.
Аввалроқ Жанубий Кореяда 13 ноябрдан бошлаб жамоат жойлари ва транспортда ниқобсиз юрган кишилар жарима тўлаши хабар берилган эди.
Жаҳон соғлиқни сақлаш ташкилоти келаси йил бошида Европада ҳам коронавируснинг учинчи тўлқини бошланиши хавфи ҳақида огоҳлантирди.
Изоҳ (0)