Ўзбекистон мобил шифохона барпо этиш учун Қирғизистонга ихтисослаштирилган шифохона контейнерларининг иккинчи партияси етказиб берди. Бу ҳақда «Ўзбекистон темир йўллари» АЖ матбуот хизмати хабар берди.
Маълум қилинишича, 200 ўринга мўлжалланган 40 та шифохона контейнерлар ортилган поезд «Бишкек-1» темир йўл станциясига етиб борган. «Ўзбекистон темир йўллари» АЖ бошқарув раиси вазифасини бажарувчи Ҳуснутдин Ҳасилов бошчилигидаги Ўзбекистон делегациясини Қирғизистон Соғлиқни сақлаш вазирлиги вакили ва «Қирғиз темир жоли» давлат корхонаси бош директори кутиб олган.
Учрашув давомида Ҳуснутдин Ҳасилов ҳамда «Қирғиз темир жоли» давлат корхонаси бош директори ўзаро ҳамкорлик ва икки давлат темир йўлларини ривожлантириш истиқболларини муҳокама қилган.
Аввалроқ Ўзбекистон Қирғизистонга тиббиёт воситалари ва 3 минг тонна буғдой, шунингдек, 200 койка-ўринга мўлжалланган тиббиёт контейнерларини юборгани тўғрисида хабар берилганди.
Эслатиб ўтамиз, 14 ноябрь куни Шавкат Мирзиёев телефон орқали Садир Жапаров билан стратегик шериклик муносабатларини муҳокама қилганди. Шу билан бирга, Шавкат Мирзиёев Ўзбекистон Қирғизистоннинг барқарор ривожланиш йўлидаги интилишини ҳар томонлама қўллаб-қувватлашини таъкидлаб ўтганди.
Маълумот учун, Ўзбекистон Қирғизистонга 2020 йилнинг апрель, май, июль ойларида ҳам инсонпарварлик ёрдами жўнатган. Шунингдек, Фарғона вилояти Қирғизистоннинг Боткен вилоятига инсонпарварлик ёрдами юборганди. Август ойида эса Ўзбекистон Қирғизистонга 560 минг долларлик инсонпарварлик ёрдами жўнатганди.
Изоҳ (0)