Президент Шавкат Мирзиёев 19 ноябрь куни бир қатор объектларни, жумладан, Ўзбекистон давлат санъат музейининг янги биноси лойиҳаси тақдимоти билан танишди. Бу ҳақда «Ўзбекистон 24» телеканалининг информацион дастурида маълум қилинди.
Маданият вазирлиги ҳузуридаги Маданият ва санъатни ривожлантириш жамғармаси буюртмасига биноан таниқли япон меъмори Тадао Андо томонидан ишлаб чиқилган лойиҳага биноан Давлат санъат музейининг ҳозирги биноси ёнида янги уч қаватли думалоқ шаклдаги иншоот қурилиши режалаштирилган.
Музей учун янги бино қуриш зарурати мавжуд бинонинг кўргазма имкониятлари чекланганлиги билан боғлиқ – ҳозир у ерда экспонатларнинг атиги 2 фоизини тақдим этиш мумкин. Янги иншоот қурилиши билан музейнинг имкониятлари ва майдони анча кенгаяди.
Маданият вазири Озодбек Назарбеков Санъат музейини «Янги Ўзбекистон учун энг муҳим музейлардан бири» деб атади.
«Айни пайтда Тошкентдаги Санъат музейи реконструкция қилинмоқда. Мен ушбу музейни янги Ўзбекистон учун энг муҳимларидан бири деб биламан. Барчамиз яхши биламизки, музей - тарих, музей бу - тарбия.
Бундан ташқари, Тошкентда бундай катта музей йўқ. Ҳозир музей экспонатларнинг атиги 2 фоизини намойиш этиш имкониятига эга», – деди Маданият вазирлиги раҳбари.
Сентябрь ойида ҳукумат комиссияси музейни реконструкция қилиш лойиҳасининг дизайн концепциясини маъқуллаганди. Вазирлар Маҳкамасининг 2019 йил 19 декабрдаги қарори билан хиёбоннинг Шаҳрисабз, Тарас Шевченко ва Ёқуб Колас кўчалари кесишмасида жойлашган қўшни ҳудуди уни кенгайтириш ва модернизация қилиш учун музейга ўтказилди.
Таъкидланишича, қўшимча ҳудудда шиша ва бетондан ишланган ва Тадао Андо меъморчилиги учун хос бўлган умумий майдони 17 минг квадрат метрдан ортиқ бўлган янги кўргазма галереяси қурилиши режалаштирилган.
Президентга тақдим этилган лойиҳанинг эскизларига кўра, янги бино Беларусь ёзувчиси ва шоири Ёқуб Коласнинг бюсти жойлашган майдоннинг муҳим қисмини эгаллайди ва илгари у ерда ўзбек шоираси Зулфиянинг ҳайкали бўлган.
https://www.youtube.com/watch?v=t1jyQTe0vPo&ab_channel=O%27зМТРКО%27збекистонмиллийтелерадиокомпанияси
Изоҳ (0)