Tesla ва SpaceX раҳбари Илон Маск Bloomberg’нинг миллиардерлар глобал рейтингида учинчи ўринга чиқиб олиб, Марк Цукербергдан ўзиб кетди, деб ёзади Meduza.
19 ноябрь ҳолатига кўра, Маскнинг бойлиги 120 миллиард долларга, Цукербергники — 103 миллиард долларга баҳоланмоқда.
Bloomberg маълумотларига кўра, бизнесменнинг давлати бир кунда 10,2 миллиард долларга ўсган, бунга Tesla акцияларининг 10 фоизга кўтарилиши сабаб бўлган.
Bloomberg рейтингида биринчи ўринни ҳамон Amazon асосчиси Жефф Безос 183 миллиард доллар билан эгаллаб турибди, иккинчи ўрин эса Microsoft асосчиси Билл Гейтсга тегишли (128 миллиард доллар).
Forbes глобал рейтингида ҳам 19 ноябрь ҳолатига кўра, Маск (тўртинчи ўрин, 105 миллиард доллар) Цукербергни (бешинчи ўрин, 99,9 миллиард доллар) ортда қолдирди.
Эслатиб ўтамиз, дунёнинг энг бой кишиларининг ўн нафари 28 октябрь куни бўлиб ўтган савдолар якунлари бўйича жаҳон фонд бозорлари қулаши фонида 33,3 миллиард доллар йўқотган эди. Бунинг оқибатида Facebook асосчиси Марк Цукерберг бойлиги 100 миллиард доллардан ошадиган кишилар рўйхатидан чиққан, Tesla асосчиси Илон Маск 3,5 миллиард доллар йўқотган эди.
Изоҳ (0)