Россияда 19 ноябрь тонгги ҳолатга кўра, коронавирусга чалиниш билан боғлиқ 23 610 та янги ҳолат қайд этилди, деб хабар бермоқда Meduza. Бу суткалик касалланишлар сони бўйича янги рекорд. Аввалги рекорд — суткасига 22 702 та касалланиш ҳолати бундан бир кун аввал қайд этилганди.
Энг кўп касалланганлар Москвада (суткасига 6438 нафар), Санкт-Петербургда (+2312) ва Москва вилоятида (+880).
Россияда COVID-19 билан касалланганларнинг умумий сони 2 015 608 нафарга етди.
Сўнгги бир кеча-кундузда коронавирусдан яна 463 киши вафот этиб, суткалик ўлим ҳолатлари бўйича пандемия бошланганидан буён янги юқори кўрсаткич бўлди. Расмий статистикага кўра мамлакатда жами 34 850 киши вафот этган.
Соғайганларнинг умумий сони 1 526 656 нафарни ташкил этмоқда. Шундан 25 573 нафари сўнгги суткада тузалиб чиққан.
“Роспотребнадзор”нинг хабар беришича, мамлакатда коронавирусни аниқлаш учун 70,6 миллионтадан ортиқ, шу жумладан, сўнгги 24 соатда 577 та тест ўтказилган.
Жонс Ҳопкинс маълумотларига кўра, Россия коронавирус қайд этилганлар сони бўйича дунёда АҚШ, Ҳиндистон, Бразилия ва Франциядан кейин бешинчи ўринда.
Мавзуга доир: Дунёда COVID-19’га чалинганлар сони 56 млн кишидан ошди
Изоҳ (0)