Facebook rahbari Mark Sukerberg Jo Baydenni AQSh prezidentlik saylovlari g‘olibi deb atadi, deb xabar bermoqda BuzzFeed News 12-noyabr kuni bo‘lib o‘tgan telekonferensiya audioyozuviga tayanib.
Foto: Reuters
Konferensiya davomida Sukerberg o‘z xodimlari savollariga javob bergan.
“Ishonchim komilki, saylov natijalari endi aniq va Jo Bayden keyingi prezidentimiz bo‘ladi. Odamlarda saylov umuman olganda adolatli o‘tganiga ishonchni saqlab qolish muhim. Va bu Trampga ovoz bergan o‘n millionlab odamlarga tegishli”, — degan Sukerberg.
Jamoatchilikka esa saylov natijalari haqida Sukerberg hali hech qanday izoh bermagan. Konferensiya davomida u nafaqat Baydenni saylovlar g‘olibi hisoblashini, balki ayrim shtatlarda qayta hisoblangan saylov natijasi Baydenning g‘alabasiga ta’sir qilmasligini ham aytgan.
“Biz qayta ko‘rib chiqishga va sudga berishga chaqirayotgan odamlarni ko‘ryapmiz, bu aksariyat hollarda ularning shaxsiy huquqi... Ammo bu odamlarning saylov natijasini o‘zgartirishga borgan sari jiddiy ishonayotgani achinarli hol”, — degan Facebook rahbari.
Konferensiya davomida Sukerberg, shuningdek, Donald Trampni yolg‘on ma’lumot tarqatganlikda birinchi marta oshkora aybladi.“Albatta, AQSh prezidentining o‘zi bevosita shunday ma’lumot tarqatayotgani muammodir”, — deb ta’kidlagan u.
AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi. Bayden Trampning saylovdagi mag‘lubiyatini tan olishdan bosh tortishini sharmandalik deb atadi. AQSh davlat kotibi hokimiyat Trampning ikkinchi ma’muriyatiga silliq topshirilishini va’da qildi.
Ko‘plab mamlakatlar rahbarlari, xususan, Janubiy Koreya prezidenti Mun Chje, Turkiya prezidenti Rajab Toyyib Erdo‘g‘on va BMT bosh kotibi Antoniu Guterrish Jo Baydenni AQSh prezidentligi saylovidagi g‘alaba bilan tabriklagan. Rossiya prezidentining matbuot kotibi Dmirtiy Peskov esa Putin “saylov natijalari rasman e’lon qilinganidan keyin” tabriklashini bildirgan.
