Берлинда полициячилар COVID-19 пандемияси сабабли жорий қилинган чекловларга қарши норозилик намойишларида камида 365 кишини қўлга олди, деб ёзади «РБК» Берлин полицияси Twitter’ига таяниб.
«19:30 га қадар жами 365 киши қўлга олинди. Кўпчилиги инфекциядан ҳимояланиш ҳақидаги қонунни бузганлик учун», — дейилади муассаса хабарида.
Полиция икки кишини сўроқ қилмоқчи. Бундан ташқари, намойишларда ўн нафар полиция ходими жабрланган.
18 ноябрь куни Германия бундестаги инфекцион касалликлардан ҳимояланиш тўғрисидаги қонунга тузатишлар киритди, бу Берлин марказида норозилик акциялари уюштирилишига олиб келди. Қонун лойиҳасини 413 депутат қўллаб-қувватлади, 235 нафари қарши чиқди, яна 8 нафари бетараф қолди.
Тузатишларга Германиянинг ҳозирги ҳукуматини шакллантирувчи Христиан демократик иттифоқ депутатлари, шунингдек, Социал-демократик партия депутатлари ташаббускорлик қилди. Бу сиёсий кучлар жорий чақириқ бундестагида ҳам кўпчилик ўринга эга.
«Инфекциялардан ҳимоя тўғрисида»ги қонун Германия ҳукуматига ижтимоий алоқаларни чеклаш ва ниқоб тақиш қоидаларини киритиш, дўконларни ёпиш ва спорт тадбирларини тақиқлаш ҳуқуқини бериши, шунингдек, мактаб ва боғчаларни ёпиш ва таълим муассасалари учун бошқа чекловларни киритиш тартибини белгилаши тахмин қилинмоқда.
Германия пойтахти марказидаги намойишларда бир неча ўн минг киши қатнашди. Янги қонунга қарши норозилик билдириш учун намойишчилар ошхона анжомларини тақиллатиб, ҳуштакларни чириллатиб чалди.
Полиция намойишчиларни тарқалишга чақирди, аммо улар парламент биносига тобора яқинлашиб келавергач, улар тарқатилди. Полиция намойишчиларни қувиш учун сув замбаракларидан ҳам фойдаланди.
Роберт Кох институти маълумотларига кўра, пандемия бошидан буён Германияда 883 307 киши COVID-19’га чалинган. Ўтган бир кеча-кундузда яна 17 561 та ҳолат аниқланган. Мамлакатда жами 13 119 киши коронавирусдан вафот этган.
Эслатиб ўтамиз, Германия канцлери Ангела Меркель мамлакатда қайтадан карантин жорий этган эди. Чекловлар 2 ноябрдан бошлаб кучга кирди ва камида декабрь ойигача давом этади. Мамлакатда ресторан ва барлар, театр ва кинотеатрлар, фитнес марказлари ва сув ҳавзалари ёпилди. Меҳмонхоналар туристларни қабул қилишни тўхтатди, концертлар эса бекор қилинди. Одамлар уйдан ташқарида энг кўпи билан 10 кишигача йиғилиши мумкин. Германияда коронавируснинг биринчи тўлқини вақтида ёпилган мактаблар ва болалар боғчалари ҳозирча ўз ишини давом эттиради.
Изоҳ (0)