Бутун дунёда пандемия бошидан буён 56 миллиондан ортиқ киши коронавирусга чалинди, деб ёзади «РБК» Жонс Ҳопкинс университети маълумотларига таяниб.
Ноябрь бошидан бери COVID-19 юқтириб олганлар 10 миллион кишига кўпайди.
Энг кўп касалланганлар қуйидаги мамлакатларда аниқланди:
- АҚШ — 11,4 миллион киши (қарийб 250 минг бемор вафот этди);
- Ҳиндистон — 8,9 миллион (130,9 минг киши вафот этди);
- Бразилия — 5,9 миллион (166,6 минг вафот этди);
- Франция — 2,1 миллион (46,7 минг вафот этди);
- Россия — қарийб 2 миллион (34,4 минг вафот этди).
Эслатиб ўтамиз, ўтган бир ҳафта ичида (8 ноябрдан 15 ноябргача) дунё бўйича 3,99 миллион киши коронавирусга чалинган. Бу пандемия бошидан буён қайд этилган энг юқори кўрсаткичдир. Шунингдек, рекорд даражада кўп — 60 мингдан ортиқ бемор вафот этган.
Аввалроқ АҚШнинг Pfizer компанияси Германиянинг BioNTech компанияси билан биргаликда ишлаб чиқарилган COVID-19’га қарши вакцинанинг самарадорлиги 95 фоизни ташкил этишини маълум қилди.
Pfizer компанияси учинчи босқич синовларининг дастлабки натижаларига таяниб, у томонидан яратилган вакцинанинг самарадорлиги 90 фоизга тенг эканлигини маълум қилганди. Шундан сўнг Россиянинг «Sputnik V» вакцинаси самарадорлиги 92 фоизни ташкил қилиши ҳақида хабар берилди.
Кейинроқ АҚШнинг Moderna компанияси томонидан яратилган вакцинанинг самарадорлиги 94,5 фоизни ташкил этгани маълум қилинди.
Маълумот учун, дунёда коронавирусга чалинганлар сони 5 октябрь куни 35 миллиондан, 11 октябрь куни 37 миллион, 14 октябрь куни 38 миллион, 19 октябрь куни 40 миллион, 22 октябрь куни 41 миллион, 5 ноябрь куни 48 миллион, 9 ноябрь куни 50 миллион, 14 ноябрь куни 53 миллион кишидан ошганди.
Изоҳ (0)