Украина президенти Владимир Зеленский яна бир марта коронавирусга топширган тести ижобий натижа берди, деб ёзади «РБК» давлат раҳбарининг Facebook’даги видеомурожаатига таяниб.
«Мен қайта топширган тест, афсуски, ҳозирча ижобий чиқди, бироқ мен ҳар куни ишлашда давом этяпман… Ўзимни тобора яхшироқ ҳис қиляпман, бугундан ҳид сеза бошладим, кучим қайтяпти», — деди Украина президенти. У, шунингдек, ватандошларига уни қўллаб-қувватлагани учун миннатдорлик билдирди ва кундан кунга аҳволи яхшиланаётганини айтди.
«Бугундан ҳид сезяпман. Кучга киряпман, ҳароратим пасаймоқда ва жонли ишга қайтиш истаги кучаймоқда», — деди президент. У тез орада тўлиқ форматда ишга қайтишига умид билдирди.
«Кейинги видеони касалхонада олмайман деб ишонаман, сизнинг кўмагингизда кўп йиллардан буён Украинага зарар келтираётган бошқа вирус ва бактерияларни ҳам енгиш учун COVID устидан тўлиқ ғалаба қозонаман деб умид қиламан. Айтганча, бу касалликларнинг фамилиялари сизга яхши таниш, биз бу дардлардан Украинани, албатта, қутқарамиз», — дея қўшимча қилди президент.
Эслатиб ўтамиз, 9 ноябрь куни Украина президенти девони Владимир Зеленскийда коронавирус аниқланганини маълум қилди. Шу куни президент девони раҳбари Андрей Ермак ҳам коронавирусга чалингани маълум бўлди. Зеленский Twitter’да ўзини яхши ҳис қилаётгани, ишлашда давом этаётгани ва касалликни енгиб ўтишига ишончи комил эканини таъкидлади.
Кейинроқ Украина президенти Владимир Зеленский украиналикларга янгиликларни ўзи етказиб туришини айтди.
Украина ССВнинг сўнгги маълумотларига кўра, мамлакатда COVID-19’га чалиниш билан боғлиқ 570 153 та ҳолат аниқланган. Бир кеча-кундузда мамлакатда 12 496 киши коронавирусга чалинган. Жами 10 112 киши вафот этган.
Изоҳ (0)