Тоғли Қорабоғда уруш тўхтатилганидан буён ўтган бир ҳафта ичида низо ҳудудида ва урушда мағлуб бўлган Арманистонда бўлаётган воқеалар ҳақида Meduza асосий маълумотларни тақдим этди.
Тоғли Қорабоғда ўт очишни тўхтатиш режимига риоя қилинмоқда, низо ҳудудига Россия тинчликпарварлари етиб келмоқда. Контингент асосини Марказий ҳарбий округнинг 15-алоҳида мотоўқчилар бригадаси бўлинмалари ташкил этади. Ҳар куни Россиянинг Арманистондаги базасига бир неча ўнлаб ҳарбий-транспорт самолётлари ҳарбий хизматчилар, техника ва моддий таъминот билан келмоқда — у ерда улар колонналар ҳосил қилган ҳолда Қорабоғга жўнаб кетмоқда. Минтақанинг ўзида сапёрлар ишламоқда, улар Тоғли Қорабоғнинг Арманистон ҳудудини Арманистон билан боғловчи Лочин йўлагини ҳамда у ердан Степанакертгача бўлган йўл қисмини миналардан тозалаб бўлди; 17 ноябрь куни эрталаб йўлакда фуқаролик транспорти ҳаракати тўлиқ очилди. Россия Мудофаа вазирлиги маълум қилишича, Степанакертга Арманистондан уч кун ичида 1207 нафар қочоқ қайтиб борган. Айни вақтда арманлар Тоғли Қорабоғнинг 1 декабрдан Озарбайжон назорати остига ўтадиган ҳудудларини ёппасига тарк этмоқда. Улар шошилинч тарзда буюмларини йиғиб, ўз уйларини ёқиб юбормоқда.
Озарбайжон президенти Илҳом Алиев Қорабоғнинг Озарбайжон назорати остига ўтадиган ҳудудлари алоҳида мақомга эга бўлмаслигини айтди. «Кўп миллатли ва кўп мазхабли ягона Озарбайжон бор, холос. Озарбайжоннинг турли халқ ва динларга мансуб барча фуқаролари тинчлик ва аҳил қўшничилик шароитларида яшайди. Арман халқи ҳам шундай шароитларда яшайди», — деди Алиев. У, шунингдек, ушбу ҳудудларда «вайрон бўлган инфратузилма» учун компенсация талаб қилиб, халқаро судга Арманистон устидан даъво беришни ваъда қилди.
Арманистонда ҳар куни митинглар бўлиб ўтмоқда, уларда бош вазир Никол Пашиняннинг истеъфоси талаб қилинмоқда. Тоғли Қорабоғда урушни тугатиш ҳақида у тузган битим «хоинлик» деб аталмоқда. Энг йирик акцияларда ўн минглаб одам қатнашмоқда. 11 ноябрдаёқ мухолифат парламентда Пашиняннинг истеъфоси масаласини кўриб чиқишга уринган эди, аммо кворум йўқлиги туфайли буни амалга ошириб бўлмади — ҳукмрон коалиция депутатлари мажлисга келмади. 17 ноябрь куни худди шу сабаб билан мухолифат ҳукуматга ишончсизлик вотумини билдира олмади. Мухолифат партияларининг норозилик намойишларини қўллаб-қувватлаётган кўпчилик етакчилари ноқонуний йиғилишларни ташкиллаштириш айбловлари билан қўлга олинди, аммо улар охир-оқибат қўйиб юборилди. 13 ноябрь куни миллий хавфсизлик хизмати Пашинянга суиқасд тайёрланганини эълон қилди. Жиноятга алоқадорликда айбланиб, мухолифатнинг тўрт етакчиси қўлга олинди; уч кундан кейин суд уларни ҳибсга олишдан бош тортди.
Пашиняннинг истеъфосини Арманистон президенти Саркисян ёқлаб чиқди. 16 ноябрь куни кечқурун у халққа мурожаат билан чиқди ва мамлакат «воқеликни рад этиб, оддий ҳаётни давом эттира олмаслиги»ни айтди. Саркисян ҳукмрон ва мухолифатчи сиёсатчилар билан, шунингдек, жамоатчилик гуруҳлари ва чет элдаги диаспоралар билан маслаҳатлашганини ва маслаҳатлашувлар якунларига кўра, ягона ечим навбатдан ташқари парламент сайловларини ўтказиш деган хулосага келганини айтди. Саркисяннинг фикрича, бунга қадар Пашинян ўз ваколатларини зиммасидан соқит қилиб, ҳокимиятни муваққат миллий розилик ҳукуматига топшириши керак.
Пашинян кетишдан бош тортмоқда, аммо ҳукуматда ўзгаришлар қилмоқда. Бош вазир Қорабоғдаги низо бу тарзда якун топишига ўзи асосий жавобгар эканлигини тан олган бўлса-да, Озарбайжонни Туркия қўллаб-қувватлагани учунгина Арманистон урушда ютқазганини айтди. 16 ноябрь куни истеъфо ҳақидаги саволга жавоб берар экан, ҳукумат раҳбари унинг кун тартибида «фақат мамлакат хавфсизлиги ва барқарорлигини таъминлаш масаласи бор»лигини таъкидлади. Шунингдек, у мухолифатдан ҳокимият алмашувига қуролли усулда эришмаслигини кафолатлашни талаб қилди. Худди шу куни Пашинян Вазирлар маҳкамаси таркибида ўзгаришлар бўлишини ваъда қилди ва ташқи ишлар вазири Зограб Мнацаканянни, кейинроқ унинг ўринбосари Шаварш Кочарянни истеъфога юборди.
Изоҳ (0)