Пашинян Қорабоғдаги можаро якуни бўйича «Йўл харитаси»ни таклиф этди

Арманистон бош вазири Никол Пашинян Тоғли Қорабоғдаги тинчлик сулҳидан сўнг, ўз ҳукуматининг кейинги ишларига оид режани тақдим этди. Сиёсатчи 15 банддан иборат «Йўл харитаси»ни Facebook’даги саҳифасида эълон қилган.

«Урушда юзага келган вазият, омадсизлик, урушдан кейинги ҳолат бўйича асосий жавобгар менман. Бироқ, шунингдек, мен ушбу муаммони енгиб ўтиш ва мамлакатда барқарорлик ҳамда хавфсизликни ўрнатишга ҳам бош масъулман», — деб ёзади Пашинян.

Унинг дастуридан қуйидаги пунктлар ўрин олган:

• ЕХҲТнинг Минск гуруҳи форматида Қорабоғ мақоми бўйича музокаралар жараёнини қайта тиклаш;
• Тинч аҳолини қайтариш ва Арцахдаги вайрон қилинган инфратузилмани қайта тиклаш;
• Ҳалок бўлганлар, жароҳат олганлар ва ҳарбий хизматчиларининг оилаларига ижтимоий кафолатни тақдим этиш;
• Арманистон Қуролли кучларини ислоҳ қилиш;
• Коронавирус пандемиясини енгиб ўтиш ва иқтисодий фаолликни қайта тиклаш;
• Партиялар тўғрисидаги қонун ва сайлов кодексига ўзгартириш киритиш.

Пашинян ушбу мақсадларга эришиш учун ярим йил керак бўлишини айтган ва 2021 йилнинг июнида «йўл харитаси»нинг бажарилгани тўғрисидаги ҳисобот беришни ваъда қилган.

Аввалроқ Никол Пашинян Тоғли Қорабоғ атрофида юзага келган мажбуриятлар учун жавобгар эканлигини маълум қилганди. Унинг фикрича, Тоғли Қорабоғдаги урушни тугатиш учун келишувни имзолашдан бошқа чора йўқ эди. Пашиняннинг айтишича, Арманистон жанговар ҳаракатларни давом эттирганида, нафақат Тоғли Қорабоғ пойтахти Степанакертни, балки бутун Тоғли Қорабоғни қўлдан чиқарган, минглаб ҳарбий хизматчилар қуршовда қолиб кетган бўларди.

Эслатиб ўтмиз, Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Ҳужжатга кўра, Боку ва Ереван эгаллаб турган позицияларида тўхтаб, Тоғли Қорабоғ ҳудудининг бир қисми, шу жумладан, стратегик жиҳатдан муҳим Шуша шаҳри Озарбайжонга ўтади. Шартларда айтилишича, Арманистон 20 ноябргача Агдам ва Калбажар туманларини, 1 декабрга қадар Лачинни Озарбайжонга қайтариши керак эди. Шунингдек, келишув минтақага Россия тинчликпарвар кучларини киритишни назарда тутади. Низони тартибга солишда бошқа мамлакатлардан тинчликпарвар кучларнинг иштирокини ўша вақтда Москва рад этган эди.