Armaniston prezidenti Pashinyan mahkamasini iste’foga chiqarishga va yangi saylovlar o‘tkazishga chaqirdi
Armaniston prezidenti Armen Sarkisyan navbatdan tashqari parlament saylovlarini o‘tkazishga va Nikol Pashinyanning vazirlar mahkamasini iste’foga yuborishga chaqirdi, deb yozadi “RBK”.
“Oxirgi bir necha kun davomida men parlament va parlament tashqarisidagi kuchlar, turli nohukumat tashkilotlar va alohida shaxslar bilan o‘nlab siyosiy maslahatlashuvlar olib bordim. Majlis ishtirokchilarining mutlaq ko‘pchiligi bitta masala bo‘yicha bir fikrda: bosh vazirning Konstitutsiyaga muvofiq iste’foga chiqarilishi zarurligi va muddatidan oldingi parlament saylovlari”, — dedi Sarkisyan xalqqa murojaatida.
Uning so‘zlariga ko‘ra, mamlakatda parlamentga muddatidan oldin saylovlar o‘tkazilishi muqarrar. Hukumat iste’fosi va yangi muddatidan oldingi saylovlar oralig‘idagi davrda mamlakatni milliy rozilik hukumati boshqarishi kerak, deb hisoblaydi Sarkisyan.
Avvalroq Sarkisyan Gadrut aholisi bilan uchrashuvda uning “boy diplomatik va muzokaraviy tajribasi” Qorabog‘ bo‘yicha qaror qabul qilishda qo‘llanilmaganiga afsus bildirgan edi. Sarkisyan Armaniston bosh vaziri hamda Rossiya va Ozarbayjon prezidentlari tomonidan imzolangan o‘t ochishni to‘xtatish haqidagi bayonotga hech qanday aloqasi bo‘lmaganini ta’kidladi.
Shuningdek, Sarkisyan muzokaralar jarayonini YeXHTning Minsk guruhi formatiga qaytarish birinchi qadamlardan biri bo‘lishi kerakligini aytdi.
Eslatib o‘tamiz, Rossiya, Armaniston va Ozarbayjon rahbarlarining bayonoti haqida e’lon qilingan kuni Sarkisyan hujjat u bilan muhokama qilinmaganini aytgandi.
“Rossiya va Ozarbayjon prezidentlari tomonidan urushni to‘xtatish bo‘yicha bitim imzolanganini matbuot orqali bildim. Shuningdek, aynan matbuot orqali urushni to‘xtatish shartlaridan xabar topdim”, — degan edi u.
Avvalroq Armaniston tashqi ishlar vaziri Zograb Mnatsakanyan iste’foga chiqqani xabar berilgan edi.
Armanistonda 10-noyabrdan beri Tog‘li Qorabog‘dagi urushni tugatish to‘g‘risidagi bitim imzolangani sababli siyosiy inqiroz davom etmoqda. Ushbu kelishuv shartlariga ko‘ra, Ozarbayjon tan olinmagan respublikaning katta hududlarini o‘z nazorati ostiga oldi. Yerevanda Nikol Pashinyanning iste’fosini talab qiladigan ommaviy mitinglar o‘tkazilmoqda.
