Россияда сўнгги суткада COVID-19 беморларининг 456 нафари вафот этди, деб хабар бермоқда Meduza. Бу пандемия бошланганидан буён суткалик ўлим ҳолатлари бўйича энг юқори кўрсаткич. Мамлакатда умумий ҳисобда COVID-19 тасдиқланган 34 387 киши вафот этган.
Суткалик ўлим ҳолатлари бўйича сўнгги юқори кўрсаткич 17 ноябрь куни кузатилган, шу куни COVID-19 беморларининг 442 нафари вафот этганди.
Сутка давомида COVID-19’га чалиниш бўйича 22 985 та янги ҳолат қайд этилган. Бир кун аввал 22 410 та ҳолат аниқланганди. Энг кўп касалланганлар Москва (4174 киши) ва Санкт-Петербург (2215) шаҳарларида.
Мамлакатда коронавирусга чалинганларнинг 1 501 083 нафари, шу жумладан, сўнгги бир кеча-кундузда 25 179 нафари соғайган.
«Роспотребнадзор» маълумотларига кўра, сўнгги 24 соат давомида коронавирусни аниқлаш учун 525 мингта тест ўтказилган, бир кун аввал 534 та тест ўтказилганди.
Изоҳ (0)