Хитойнинг Чунсин шаҳридаги Буюк Британия бош консули Стивен Эллисон дарёда чўкаётган талаба қизни қутқарди. Воқеа гувоҳлари олган видео интернетнинг Хитой сегментида тарқалди, деб ёзмоқда Meduza.
Хабарда айтилишича, воқеа 14 ноябрь куни Чжуншан шаҳрида машҳур сайёҳлик маршрутида содир бўлган. 24 ёшли қиз кўприкдан сувга йиқилиб тушган. Яқин атрофда буни кўрган кўплаб одамлар бўлган, лекин ҳеч ким қизнинг орқсидан сакрашга ҳаракат ҳам қилмаган. Шунда 61 ёшли Эллисон уни қутқаришга қарор қилган. У ҳушидан кетган қизнинг ёнига сузиб борган, шундан сўнг одамлар қирғоқдан қутқариш ҳалқасини ташлаб, уларга сувдан чиқишга ёрдам берган.
Хитой Ташқи ишлар вазирлигининг расмий вакили Чжао Лисзян Эллисоннинг ҳаракатини «қаҳрамонлик» деб атаган. Ўз навбатида Хитойнинг Буюк Британиядаги элчиси Ли Сяомин «Ушбу қаҳрамонлик ва меҳрибонлик ҳаракати унутилмайди ва Хитой–Британия дўстлиги тарихига ёзилади», — деб айтган.
The Guardian’нинг қайд этиб ўтишича, Буюк Британия ва Пекин ўртасидаги дипломатик муносабатлар айни пайтда жуда кескин. Бу сўнгги йилда Пекиндан Гонконгга босим кучайиши, шунингдек, Huawei’га Буюк Британияда 5G тармоқларини жойлаштиришда иштирок этиш мамлакат ҳукумати томонидан тақиқлангани билан боғлиқ.
Хитой ижтимоий тармоқларида изоҳ ёзган аксарият фойдаланувчилар Эллисонни қаҳрамон деб атади, аммо кўпчилик чет элликдан бошқа ҳеч ким қизни қутқармаганига жаҳли чиққанини ҳам билдирган.
The New York Times’нинг ёзишича, Хитойда кўпчилик одамлар ёрдам беришдан қўрқади. Чунки кейинчалик жабрланган одамга зарар етказишда айбланиб, даволаниш учун харажатга тушишлари мумкин. Бундай ҳолатлар мамлакатда сўнгги йилларда бир неча марта кузатилган.
Шунингдек, нашрнинг қайд этишича, аксарият хитойликлар сузишни билмайди — мамлакатда йил давомида 60 мингга яқин киши чўкиб ўлади. Бундай ўлим Хитойда 14 ёшгача бўлган болалар орасидаги ўлимларнинг энг кенг тарқалган сабабларидан биридир.
Изоҳ (0)