Путин Арманистоннинг тинчлик битимидан воз кечиш эҳтимолини ўз жонига қасд қилиш деб атади

Россия президенти Владимир Путин Арманистонда ҳокимият ўзгарган тақдирда, улар Тоғли Қорабоғ бўйича тинчлик шартномасидан воз кечса, бу катта хато бўлишини айтди. Бу ҳақда у «Россия 24» телеканали эфирида маълум қилди, деб ёзади «РБК». «Бу ўз жонига қасд қилиш бўларди», — деди у.

Путиннинг аниқлик киритишича, эришилган келишувларга риоя қилиш-қилмаслик — «ҳар кимнинг ўз иши», аммо унинг фикрича, улардан воз кечиш «катта хато» бўлади. Президент бундай ҳолат юз бермаслигига умид қилди.

«Уруш қилаётган ёки жанговар ҳаракатлар қайта бошланиши хавфи остида бўлган мамлакат ўзини бундай тутиши мумкин эмас, шу жумладан, ҳукуматни ташкиллаштириш соҳасида, жамиятни ичидан парчалай олмайди», — деди президент.

Аввалроқ Путин Алиев билан Қорабоғ бўйича дастлабки музокаралар Пашинян туфайли барбод бўлганини айтганди. Тоғли Қорабоғдаги ҳарбий низо октябрда тугаши мумкин эди, лекин ўша пайтда Арманистон томони ўт очишни тўхтатиш ҳақидаги таклифни қабул қилишдан бош тортган.

Арманистонда 10 ноябрдан бери Тоғли Қорабоғдаги урушни тугатиш тўғрисидаги битим имзолангани сабабли сиёсий инқироз давом этмоқда. Ушбу келишув шартларига кўра, Озарбайжон тан олинмаган республиканинг катта ҳудудларини ўз назорати остига олди. Ереванда Никол Пашиняннинг истеъфосини талаб қиладиган оммавий митинглар ўтказилмоқда.

Арманистон президенти Армен Саркисян навбатдан ташқари парламент сайловларини ўтказишга ва Никол Пашиняннинг вазирлар маҳкамасини истеъфога юборишга чақирди.