Мустаҳкам соғлиқ ва сифатли тиббий хизмати — фаровон, қулай ҳаётнинг асосий кўсаткичидир. «РБК»нинг ёзишича, октябрь ойида ўтказилган сўровнома натижаларига кўра Россия аҳолисининг ярмидан кўпи шундай фикрда.
Тадқиқот «Росгосстрах жизн» компанияси ва «Откритие» банки томонидан телефон орқали сўров усулида ўтказилган. Унда барча федерал округлардан 1503 нафар киши, шу жумладан, 48 фоиз эркак, 52 фоиз аёл қатнашган. Уларнинг 26,1 фоизини 18-29 ёш, 28,7 фоизини 30-49 ёш, 14,6 фоизини 50-59 ёш ва 30,5 фоизини 60 ва ундан катта ёшдаги фуқаролар ташкил этган.
Иштирокчиларга ўз ҳаётларини фаровон деб ҳисоблайдиларми ва бундай ҳаётнинг асосий кўрсаткичи айнан нимада, деган саволга жавоб бериш сўралган. Респондентларнинг 70, 4 фоизи яхши тиббий хизмат ва соғлиқ деб жавоб берган, 41,6 фоизи — юқори даромад, 31,7 фоизи — ўз уй-жойига эга бўлишни фаровон турмуш белгиси деб айтган.
Шунингдек, иштирокчиларнинг 18 фоизи асосий мезон сифатида саёҳат қилиш имкониятини, 17,3 фоизи давлатнинг юқори даражада ижтимоий қўллаб-қувватлашини, яъни имтиёзлар, солиқ чегирмаларини кўрсатган.
Фаровон ҳаёт белгиси сифатида севимли иш ёки бизнес (14,7 фоиз), ҳеч қаерда ишламай пассив даромадга эга бўлиш (4,4 фоиз), шахсий автомобилнинг борлиги (4,2 фоиз) ҳам қайд этилган. Иштирокчиларнинг 0,4 фоизи пойтахтда ёки бошқа бирор йирик шаҳарда яшашни фаровон ҳаёт белгиси сифатида кўришини билдирган.
Шу билан бирга, фаровон ҳаётнинг қандай белгисига эгасиз деган саволга россияликларнинг аксарияти автомобили борлигини айтган (67,1 фоиз).
Сўровнома иштирокчиларининг ярмида кўпи (54,7 фоизи) ўз ҳаёти сифатидан мамнун ёки деярли қониқади. Эркакларникига қараганда (52,6 фоиз) кўпроқ аёллар (56,8) бундан мамнунлигини билдирган. Ёшлар (18-29 ёш) 30 ёшдан 49 ёшгача бўлган катталарга қараганда ўз ҳаётидан кўпроқ қониқиш билдирган.
Респондентларнинг фақат 50 ёшдан 59 ёшгача бўлганлари (51,3 фоизи) ўз ҳаётлари шароитидан қониқмаётганини маълум қилган.
Изоҳ (0)