Туркия парламенти мамлакат президенти Ражаб Тоййиб Эрдўғоннинг Озарбайжонга қўшинларни юбориш тўғрисидаги фармонини маъқуллади, деб ёзади «РБК» Туркиянинг НТВ телеканалига таяниб.
Давлат раҳбарининг таклифини ҳукмрон Адолат ва тараққиёт партияси, шунингдек, Халқ республика партияси, «Яхши партия» ва Миллий бирдамлик партияси депутатлари қўллаб-қувватлади.
Озарбайжон ҳудудига Туркия қуролли кучларини юбориш ҳақидаги меморандум лойиҳаси 16 ноябрь куни кўриб чиқиш учун киритилган эди. Ҳужжатга кўра, ҳарбийлар бир йил мобайнида Боку ва Ереван ўртасидаги ўт очишни тўхтатиш режимига риоя қилиниши устидан назорат олиб боради.
Ҳукумат қайд этишича, низо ҳудудига ҳарбийларни жўнатиш Туркия миллий манфаатларига мувофиқ келади.
Шу билан бирга, Россия ташқи ишлар вазири Сергей Лавровнинг сўзларига кўра, Туркия тинчликпарварлари Тоғли Қорабоғ ҳудудига кирмайди. Туркия фақатгина Озарбайжон ҳудудида туриб вазиятни кузатади, дея аниқлик киритди Лавров.
Туркиялик кузатувчиларнинг Боку ва Ереван ўртасидаги низони тартибга солишдаги иштироки ҳақида биринчи марта Озарбайжон президенти Илҳом Алиев гапирган эди. Ҳарбий ҳаракатларни тўхтатиш ҳақида битим имзоланганидан кейин дарҳол у Россия ва Туркия Тоғли Қорабоғда қўшма тинчликпарварлик миссиясини олиб боришини маълум қилди.
Ўшанда Россия президенти матбуот котиби Дмитрий Песков унинг гапларини рад этиб, Арманистон, Озарбайжон ва Россия раҳбарлари имзолаган шартномада туркиялик тинчликпарварлар ҳақида ҳеч нарса айтилмаганини маълум қилди.
Кейинроқ Эрдўғон Россия президенти Владимир Путин билан суҳбат чоғида низо ҳудудига тинчликпарварлик миссиясини юбориш нияти ҳақида шахсан маълум қилди. Шу муносабат билан АҚШ давлат котиби Майк Помпео ва Франция ташқи ишлар вазири Жан-Ив Ле Дриан Россия томонидан Тоғли Қорабоғдаги низони тартибга солишда Туркиянинг ролини тушунтириб беришни сўради. Ўшанда Песков ЕХҲТнинг Минск гуруҳи раисдошлари учун зарур бўлган изоҳлар тақдим этилади, дея жавоб берган эди.
Сентябрь охиридан буён Тоғли Қорабоғда Арманистон ва Озарбайжон ўртасидаги жанговар ҳаракатлар давом этиб келаётган эди. Боку ва Ереван ҳарбий ҳолат эълон қилди ва бир-бирини тинч аҳоли вакилларига ҳужумларда айблади. Ўт очишлар оқибатида ҳарбий хизматчилар ҳам, тинч аҳоли ҳам қурбон бўлди.
Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Ҳужжатга кўра, Боку ва Ереван эгаллаб турган позицияларида тўхтаб, Тоғли Қорабоғ ҳудудининг бир қисми, шу жумладан, стратегик жиҳатдан муҳим Шуша шаҳри Озарбайжонга ўтади. Шартларда айтилишича, Арманистон 20 ноябргача Агдам ва Калбажар туманларини, 1 декабрга қадар Лачинни Озарбайжонга қайтариши керак эди. Шунингдек, келишув минтақага Россия тинчликпарвар кучларини киритишни назарда тутади. Низони тартибга солишда бошқа мамлакатлардан тинчликпарвар кучларнинг иштирокини ўша вақтда Москва рад этган эди.
Изоҳ (0)