Ўзбекистонда 30 ноябрдан бошлаб электрон кундалик пулли бўлади — йилига 9200 сўм

Ўзбекистондаги электрон кундалик платформаси учун ажратилган синов муддати тугагани муносабати билан платформанинг бошқа функцияларидан фойдаланиш учун эндиликда обуна бўлиш лозим бўлади. Бу ҳақда Халқ таълими вазирлиги хабар берди.

Ўзбекистонда 2020 йилнинг август ойида янги 2020/2021-ўқув йилидан бошлаб 1200 та мактабда қоғоз кундаликлар ва журналлар бекор қилиниши маълум бўлганди.

Электрон кундалик платформасига йиллик обуна нархи қоғоз кундаликнинг ўртача нархига тенг — 9200 сўм. Уч ва ундан ортиқ фарзанди бор оилалар учун 10 фоизлик чегирма мавжуд.

Ушбу пул тўлангач, ота-она ва ўқувчининг истаган бошқа яқин қариндошлари бир календарь йил давомида боланинг мактаб ҳаётини кузатиш имконига эга бўлади.

Электрон тўловнинг икки йўли мавжуд — пластик карта ҳамда Click тўлов тизими орқали. Электрон кундалик учун тўловни амалга ошириш йўриқномаси билан бу ерда танишиш мумкин.

Ота-оналарга ўзларининг профилларидан кириш ва барча фарзандларининг кундаликларини кўра олишларини текширишлари тавсия этилади. Электрон кундаликда ота-онанинг битта аккаунтига ҳар бир фарзандини «боғлаш» мумкин. Бунинг учун бола таълим олаётган муассасага мурожаат қилиш лозим.

Вазирлик матбуот хизматининг маълум қилишича, бугунги кунга қадар 1557 та мактаб электрон кундалик тизимида рўйхатдан ўтган, шундан 1482 мактаб қоғоз журнал ва кундаликдан бутунлай воз кечган. 2020 йил 1 ноябрь ҳолатига кўра, Ўзбекистондаги 10 008 та умумий ўрта таълим муассасаларида 6 236 751 нафар ўқувчи таълим олмоқда.