Наманган вилоятида 80 ёшга тўлган фуқаро ва унинг 77 ёшли турмуш ўртоғи расмий равишда никоҳдан ўтказилди, дея хабар берди вилоят ДХМ матбуот хизматига таяниб «Xabar.uz».
Маълум қилинишича, 1940 йил Наманган шаҳрида туғилган Маҳмуджон Мирзабоев 1943 йилда туғилган Райҳона Усмонова билан шаръий никоҳдан ўтиб яшаб келаётган бўлган. Лекин шу вақтга қадар улар қонуний никоҳдан ўтмаган.
Орадан 55 йил вақт ўтиб, Наманган шаҳар 2-сонли ФҲДЁда уларнинг никоҳлари расмийлаштирилди.
«Тўйимизга кўп вақт бўлган бўлса-да, гувоҳнома олиш учун вақт ажратмаганимизни қаранг. Ҳозир невара, чеваралик бўлганимизда биринчи марта никоҳни қайд этганимиз 80 ёшли юбилей тўйимга ажойиб совға бўлди», – дейди Маҳмуджон Мирзабоев.Шунингдек, Наманган шаҳрида истиқомат қилаётган 59 ёшлик Пак Геронтий ҳамда 55 ёшни қаршилаган Динара Абдураҳмоноваларга ҳам никоҳдан ўтганлик тўғрисида гувоҳнома берилган. Улар ҳам 30 йилдан ортиқ никоҳ гувоҳномасиз яшаб келаётган эди.
Аввалроқ Андижонда уйда туғилгани учун ўз вақтида гувоҳнома ололмаган тўрт нафар болага туғилганлик ҳақидаги гувоҳнома берилгани, Зангиотада яшовчи 35 ёшли эркакка туғилганлик тўғрисидаги гувоҳнома берилгани ҳамда Тошкентда 25 йил ҳеч қаерда қайд этилмаган йигитга фуқаролик паспорти берилгани ҳақида хабар берилганди.
Изоҳ (0)