Пандемия шароитида Ўзбекистонда ҳомиладор аёллар амал қилиши лозим бўлган тавсиялар берилди

Коронавирусга қарши кураш штаби аъзоси Барно Абдусаматова пандемия шароитида ҳомиладор аёллар амал қилиши лозим бўлган тавсияларга тўхталиб ўтди.

Жумладан, у ҳомиладорлар кўчаларда, дўконларда ва одамлар тўпланадиган бошқа жойларда инсонлар билан алоқани камайтириш ёки у ерларга боришни вақтинчалик чеклаши жуда муҳимлигини таъкидлаган. Чунки коронавирус инфекцияси қай даражада оғир кечиши вирус юкламасига боғлиқ.

Ҳаттоки тиббиёт муассасига режали ташрифингизда ҳам одамлар тўпланган жойларда юрмаслик учун боришдан олдин шифокорингиз билан телефон орқали вақтингизни келишиб олинг. Оломонда сиз COVID-19’га чалинган бирон кимса билан яқин мулоқотда бўлишингиз эҳтимоли кўпроқ, ва сиз 2 метрлик жисмоний масофани сақлашингиз қийин бўлади.

Барно Абдусаматова, Коронавирусга қарши кураш штаби аъзоси

«Қўлингизни тез-тез ва яхшилаб ювишда давом этинг, ушбу оддий гигена қоидаси сизни нафақат короновирус инфекциясидан балки бошқа кўплаб юқумли касалликлардан ҳимоялайди. Тиббий ниқобларни ечишга ҳали эрта. Карантин чекловлари ечилди ва одамлар кўчада гавжумлашди. Эҳтимолий хавфдан ўзингизни ҳимоя қилинг. Уйдан ташқарида тиббий ниқоб тақишни давом этинг»,— дейди Абдусаматова.

Эслатиб ўтамиз, аввалроқ Коронавирусга қарши курашиш штаби аъзоси, профессор Ҳабибулло Оқилов эмизикли оналар коронавирусга чалинган бўлса, фарзандини қандай эмизиши борасида аниқлик киритиб ўтган, Соғлиқни сақлаш вазирлиги томонидан Ўзбекистонда коронавирусга чалинган ҳомиладор аёллар учун қандай шароитлар яратилгани ҳақида маълумот берилган эди. Шунингдек, ҳомиладорларнинг иситмаси кўтарилса, у COVID-19 билан касалланган ёки касалланмаганидан қатъи назар стационарга юборилиши шартлиги, Ўзбекистонда туғруқхонага келаётган ҳомиладор аёллардан тест топшириб келиш талаб этилмаслиги ҳақидаги хабарлар ҳам берилган.