Автомобилни бир мил масофага итариб бориш бўйича янги жаҳон рекорди Финляндияда ўрнатилди. Маҳаллий IТ-мутахассиси Юсси Каллиони ўзининг 2,1 тоннали Saab’ида 1609,34 метрни 13 дақиқа 26 сонияда босиб ўтиб, олдинги рекордни тахминан 2 дақиқага янгилади, деб хабар беради Motor.
47 ёшли Каллиони рекордни ўрнатиш учун ўзининг шахсий автомобилини танлаган — 2006 йилда ишлаб чиқарилган Saab 9-7х. Рекордчи унинг моторини ўт олдириш натижасида чиқадиган овоз сабаб машинага Röhkö лақабини берган. Бундан олдинги рекорд 11 йил олдин ўрнатилганди: у хорватиялик Марио Млинаричга тегишли бўлиб, эркак 1,9 тоннали автомобилни бир мил масофага 15 дақиқа 21 сонияда итариб борган.
Каллиони машинани итариш жараёнини кўплаб омилларга боғлиқ мураккаб «пазл» деб атаган. Юссининг сўзларига кўра, Гиннеснинг рекордлар китобига кириш учун қўпол куч эмас, балки энергияни тўғри тақсимлаш имконини берувчи мунтазам машқлар ёрдам берган.
Рекордчининг таъкидлашича, керакли қувватга эришишнинг фақат иккита усули бор: ўз кучингни ошириш ёки қаршиликни камайтириш. Сўнгги вазифани бажариш учун у машинага ишқаланиш қаршилигини кам бўлган Nokian Hakkapeliitta R3 SUV покришкаларини «кийгизган».
Бутун масофа давомида мутахассислар Юссининг мушаклари зўриқишини махсус датчикларга эга Myontec Oy «ақлли» костюми ёрдамида кузатган. Уларнинг маълумотларига кўра, мушаклар максимал қувватнинг 40 фоизигагина зўриққан, Юссининг пульси эса дақиқасига 164 га чиққан. Шу билан бирга, машина эришган максимал тезлик соатига 10,4 километрни ташкил этади. Эътиборли жиҳати, бунга қадар рекордчининг белида жиддий муаммо кузатилган — у ўтган йилги реабилитация курсларидан сўнг, рекорд ўрнатиш бўйича ўйлай бошлаган.
Мавзуга доир:
Изоҳ (0)