Тошкент шаҳри Олмазор туманида бегонага тегишли Spark автомобилини олиб қочиб, йўл-транспорт ҳодисаси содир қилган 21 ёшли йигит қамоққа олинди, дея хабар бермоқда Тергов департаменти.
Қайд этилишича, 2020 йилнинг 7 ноябрь куни соат 11:00 дан соат 14:00 га қадар бўлган вақт оралиғида номаълум шахс транспорт воситасини олиб қочиш мақсадида 27 ёшли Б.М. бошқариб келаётган ва 34 ёшли турмуш ўртоғи Д.М.га тегишли бўлган қора рангли Spark русумли автоуловини Тошкент шаҳар, Олмазор тумани, Зарқайнар кўчасида жойлашган Абдулла Қодирий номидаги истироҳат боғи ёнида қаровсиз қолдирилганидан фойдаланиб, автоуловнинг салонига ғайриқонуний равишда кириб олган.
У ўт олдириш тизимида турган калит билан автоуловни олиб қочиб, ҳодиса жойидан яширинган.
Шундан сўнг номаълум шахс автомашинани бошқариб бораётиб, Юнусобод туманида Nexia русумли автомашина билан тўқнашиб ЙТҲ содир қилган.
Nexia автомашинаси ҳайдовчиси билан «келишиб олиш» мақсадида уни кейинроқ учрашиб, зарарни қоплаб беришга ишонтириб, автомашинада бўлган ҳамда транспорт воситасининг эгасига тегишли автоуловнинг техник паспортини бериб юборган.
ИИО ходимларидан яшириниш мақсадида автомашинанинг давлат рақамларини ечиб олиб, ҳодиса жойидан яширинган.
Бироқ ички ишлар органлари ходимларининг тезкор ҳаракатлари ва ЙТҲ содир бўлган камераларда қайд қилинган видеоёзувлар ёрдамида ушбу фуқаро 21 ёшли, муқаддам судланган М.А.лиги аниқланган.
Қоидабузар фуқарони ушлаш чоралари кўрилганда М.А. олиб қочилган автомашинани ўзи истиқомат қиладиган кўп қаватли уйларнинг олдида ташлаб, уй юмушлари билан шуғулланиб юрганлиги аниқланиб, процессуал тарзда ушланган.
Мазкур ҳолат юзасидан айбланувчига нисбатан Олмазор тумани ИИО ФМБ Тергов бўлими томонидан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган. М.А. айбланувчи тариқасида жиноят ишида иштирок этишга жалб қилиниб, унга нисбатан қамоққа олиш тарзидаги эҳтиёт чораси қўлланилган. Ҳозирда тергов ҳаракатлари давом этмоқда.
Аввалроқ Тошкент вилоятида Миллий гвардия ҳарбий кийимини кийиб олган босқинчилар, Тошкентда Камерун фуқаросини тутқунликда сақлаган жиноий гуруҳ ҳамда Самарқандда корхона директорининг Trailblazer’ини олиб қочмоқчи бўлган ишчи қўлга олингани ҳақида хабар берилганди.
Изоҳ (0)