Россияда COVID-19’дан ўлим ҳолатлари бўйича суткалик антирекорд қайд этилди. Бир кунда 439 киши вафот этди

Россияда 12 ноябрь тонгги ҳолатга кўра, коронавирусга чалиниш билан боғлиқ 21 608 та янги ҳолат қайд этилди, деб хабар бермоқда Meduza.

Энг кўп касалланиш ҳолатлари Москва (сутка давомида 5997 та) ва Санкт-Петербургда (бир сутка ичида 1667 та) кузатилган. Мамлакатда коронавирусга чалинганларнинг умумий сони 1 858 568 кишига етди.

Сўнгги бир кеча-кундузда инфекциядан 439 киши вафот этган. Инфекциядан ўлим ҳолатлари сони қаторасига иккинчи кун рекорд даражада бўлди. Бир кун аввал беморларнинг 432 нафари вафот этгани хабар берилган эди. Пандемия бошланганидан буён мамлакатда жами 32 032 киши вафот этган.

Соғайганлар сони 1 388 168 нафарни ташкил этмоқда, шулардан 18 811 нафари сўнгги суткада тузалиб чиққан.

Россияда коронавирусни аниқлаш бўйича сўнгги 24 соат ичида 5151 мингта, умумий ҳисобда эса 66,7 миллионтадан ортиқ тест ўтказилган.