Rossiyada sutka davomida 432 kishi COVID-19’dan vafot etdi. Bu o‘limlar soni bo‘yicha yangi sutkalik antirekord

Rossiyada 11-noyabr tonggi holatga ko‘ra, koronavirusga chalinish bilan bog‘liq 19 851 ta holat qayd etildi, deb xabar bermoqda Meduza.

Eng ko‘p kasallanish holatlari Moskva (sutka davomida 4477 ta) va Sankt-Peterburgda (bir sutka ichida 1571 ta) kuzatilgan. Mamlakatda koronavirusga chalinganlarning umumiy soni 1 836 960 kishiga yetdi.

So‘nggi bir kecha-kunduzda infeksiyadan 432 kishi vafot etib, bu COVID-19’dan sutkalik o‘lim holatlari soni bo‘yicha yangi rekord bo‘ldi. Pandemiya boshlanganidan buyon mamlakatda jami 31 593 kishi vafot etgan.

Sog‘ayganlar soni 1 369 357 nafarni tashkil etmoqda, shulardan 18 616 nafari so‘nggi sutkada tuzalib chiqqan.

Rossiyada koronavirusni aniqlash bo‘yicha so‘nggi 24 soat ichida 512 mingta, umumiy hisobda esa 66,1 milliontadan ortiq test o‘tkazilgan.