Италияда коронавирусга чалинганлар сони 1 миллиондан ошиб, 1 028 424 кишига етди, деб хабар бермоқда «Коммерсантъ» Жонс Ҳопкинс университети маълумотларига таяниб.
Ўтган бир кеча-кундуз ичида 32 961 та янги ҳолат қайд этилган. Бутун пандемия мобайнида 42 953 киши вафот этган, 372 113 киши соғайган.
Италия касалланганлар сони бўйича дунёда ўнинчи ўринни эгалламоқда. Биринчи учликни АҚШ (10,4 миллион), Ҳиндистон (8,6 миллион) ва Бразилия (5,7 миллион) банд қилиб турибди. Дунё бўйича жами 51,97 миллионта ҳолат қайд этилган.
Вафот этганлар сони бўйича Италия олтинчи ўринда турибди. Ўлим ҳолатларининг энг кўпи АҚШда (240,8 минг), Бразилияда (162,8 минг) ва Ҳиндистонда (127,5 минг) кузатилган. Ўлимлар сони дунё бўйича 1,28 миллионтага тенг.
Аввалроқ Жаҳон соғлиқни сақлаш ташкилоти (ЖССТ) Даниядан ташқари, Испания, Италия, АҚШ, Нидерландия ва Швецияда ҳам қоракўзанлар коронавирус билан касаллангани аниқлангани ҳақида хабар берганди.
Италиянинг бутун ҳудудида 4 ноябрдан коронавирус тарқалиши сабабли комендантлик соати жорий қилинди. Мамлакат аҳолисининг соат 22:00 дан 05:00 гача уйдан чиқиши тақиқланган.
Изоҳ (0)