UNG Petro компанияси 2020 йилнинг 10 ноябридан бошлаб автомобилга ёнилғи қуйиш шохобчаларида импорт қилинадиган Аи-95 маркали бензиннинг бир литри нархини 6600 сўмдан 6300 сўмга туширади. Бу ҳақда компания томонидан маълум қилинди.
«Бизнинг компаниямиз бозор муносабатлари механизмига қатъий амал қилади ва маҳсулот таннархи пасайганда, албатта, унинг сотиш нархи ҳам пасаяди. Бундай амалиёт давом эттирилади», — дея маълум қилган UNG Petro директори Мирзоҳид Мусаев.
Бироқ «Xabar.uz» нашрининг ёзишича, 8 ноябрдан бошлаб Ўзбекистон бўйлаб Аи-80 маркали бензиннинг нархи ошди.
Қайд этилишича, шу вақтгача Тошкент шаҳридаги айрим АЁҚШларда Аи-80 маркали бензин 4100 сўмдан 4500 сўмгача сотилаётган эди. Ҳозирда ушбу маркадаги бензин турли ёнилғи қуйиш шохобчаларида 4500 сўмдан 4800 сўмгача бўлган нархларда сотилмоқда.
Ижтимоий тармоқларда ҳам Тошкент шаҳридаги АЁҚШларда Аи-80 маркали бензин 4800 сўмдан сотилаётгани акс этган суратлар тарқалди.
Telegram’даги «bakiroo» каналининг ёзишича, кейинги бир ой давомида жаҳон бозорида нефть нархи ўртача 10 фоизга арзонлаган. Дунёда нефть нархи тушиши билан Ўзбекистонда бензин нархи ошиши анъанага айланган.
«Ўзбекистонда монополистлар томонидан шаклланган анъанага биноан энг арзон, энг сифатсиз, лекин асосан қора халқ истеъмолидаги Аи-80 бензин чакана нархлари 7-8 фоизга ёки 300-400 сўмгача кўтарилган. Бугундан бошлаб ёнилғи қуйиш шохобчалари Аи-80 бензинни 4600-4800 сўмлик нархларда сотмоқдалар», — деб ёзган канал муаллифи.
Аввалроқ «Ўзбекнефтгаз» АЖга қарашли ёқилғи қуйиш шохобчаларида 1 ноябрдан бошлаб импорт дизель ёқилғисининг нархи 6500 сўмдан 6000 сўмга арзонлаштирилиши маълум қилинганди.
Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг, 1 майдан дизель ёқилғиси нархи 500 сўмга пасайиб, 6500 сўм қилиб белгиланган. 3 майдан бошлаб эса Аи-80 бензинининг нархи 500 сўмга пасайиб, бир литри 4000 сўмдан сотила бошлаган.
Бундан ташқари, «Ўзбекнефтгаз» компаниясининг UNG бренди остидаги автомобилларга ёнилғи қуйиш шохобчаларида 13 апрелдан бошлаб Аи-91 маркасидаги бензиннинг бир литри нархи 5800 сўмдан 5600 сўмгача пасайтирилган. Шунингдек, дизель нархи 1 мартдан бошлаб 7500 сўмдан 7300 сўмга пасайтирилган, 3 апрелдан бошлаб эса дизель нархи яна 300 сўмга арзонлаштирилган ҳолда сотувга чиқарилганди.
Изоҳ (0)