Қозоғистонда бир ҳафтада яна 3486 кишида, Қирғизистонда эса 3910 кишида коронавирус аниқланди

Қозоғистонда ўтган бир ҳафта ичида 3486 кишида коронавирус тасдиқланди. Бу ҳақда мамлакат Соғлиқни сақлаш вазирлигига таяниб, Tengrinews хабар берди.

Маълумотларга кўра, мамлакатда ҳозирга қадар COVID-19 билан касалланганларнинг умумий сони 115 439 нафарга етган, уларнинг 107 530 нафари соғайган, 1879 киши вафот этган. Шунингдек, 1 августдан буён Қозоғистонда 38 721 кишида пневмония аниқланган бўлиб, уларнинг 406 нафари вафот этган. Мамлакатда ўтган бир сутканинг ўзида яна 161 кишида коронавирус аниқланган.

Коронавирусга чалиниш бўйича ҳолатлар қуйидаги ҳудудларда аниқланган:

• Олмаота шаҳри — 14 912;
• Нур-Султон шаҳри — 14 789;
• Атирау вилояти — 11 350;
• Қарағанда вилояти — 10 678;
• Шарқий Қозоғистон вилояти — 11 443;
• Ғарбий Қозоғистон вилояти — 7186;
• Чимкент шаҳри — 5257;
• Олмаота вилояти — 5214;
• Жамбил вилояти — 4212;
• Шимолий Қозоғистон — 4656;
• Павлодар вилояти — 4564;
• Костанай вилояти — 3808;
• Ақмўла вилояти — 3930;
• Туркистон вилояти — 3422;
• Манғистов вилояти — 3405;
• Қизилўрда вилояти — 3262;
• Ақтўбе вилояти — 3351.

Аввалроқ Қозоғистонда коронавирус билан қайта касалланиш бўйича биринчи ҳолат қайд этилгани тўғрисида хабар берилганди.Қирғизистонда 1—7 ноябрь кунлари давомида коронавирусга чалинганлар сони 3910 кишига ошиб, мамлакатда COVID-19 билан касалларнинг умумий сони 62 304 кишига етди. Бу ҳақда мамлакат Соғлиқни сақлаш вазирлигига таяниб, Kloop хабар берди. Ўтган бир сутка ичида яна 551 кишида коронавирус тасдиқланган.

Ўтган бир сутка ичида коронавирусга чалиниш бўйича ҳолатлар қуйидаги ҳудудларда аниқланган:

• Бишкек — 160;
• Чуй вилояти — 95;
• Ўш вилояти — 54;
• Жалолобод вилояти — 91;
• Иссиқкўл вилояти — 40;
• Ўш шаҳри — 42;
• Боткен вилояти — 50;
• Норин вилояти — 7;
• Талас вилояти — 17.

Қирғизистонда ҳозирга қадар коронавирусга чалинган беморларнинг 53 406 нафари соғайган бўлса, 1172 киши COVID-19 қурбонига айланган. Айни вақтда 3445 бемор стационарларда даволанмоқда.Афғонистон Соғлиқни сақлаш вазирлигининг маълумотларига кўра, ўтган бир ҳафта ичида мамлакатда яна 1646 кишида коронавирус аниқланган, деб хабар беради Tolo News.

Бутун мамлакатда ҳозирга қадар коронавирус инфекцияси билан касалланганлар сони 42 033 кишига етган.

Беморларнинг 34 446 нафари соғайган бўлса, 1556 киши вирус асоратлари оқибатида вафот этган.

Вазирлик маълумотларига кўра, бугунги кунга қадар давлат марказларида 125 112 марта коронавирусга тест олинган.

Тожикистонда ўтган бир ҳафта давомида коронавирус билан касалланганлар сони 242 кишига ошиб, мамлакатдаги умумий касаллар сони 11 219 кишига етди, деб хабар беради Central Asia.

Ўтган бир сутка ичида яна 39 кишида COVID-19 аниқланган.

Мамлакат Соғлиқни сақлаш вазирлигининг маълумотларига кўра, ҳозирга қадар Тожикистонда 83 киши COVID-19 қурбонига айланган. Ҳозирга қадар мамлакатда 10 494 киши соғайган.

Ўзбекистонда 7 ноябрь соат 18:00 ҳолатига кўра, коронавирус инфекцияси қайд этилганлар сони 68 438 нафарни ташкил этмоқда. Бу ҳақда ССВ матбуот хизмати хабар берди.

Ўтган бир ҳафта ичида 1637 кишида COVID-19 тасдиқланган. Мамлакатда ҳозирга қадар 65 686 нафар коронавирус инфекциясига чалинган фуқаролар тузалган ва соғайиш кўрсаткичи 96 фоизни ташкил қилмоқда.

Ҳозирда Ўзбекистонда 2169 нафар беморга шифокорлар томонидан белгиланган стандартлар бўйича даво чоралари кўрилмоқда.