АҚШ президентлигига Демократик партиядан номзод Жо Байден америкаликларга қилган мурожаатида сайловларда рақиби, амалдаги президент Дональд Трамп устидан етарли даражадаги устунлик билан ғалаба қозонишига ишонишини билдирди. Бу ҳақда «Интерфакс» хабар берган.
Байден гарчи ҳисоб-китобларга кўра унга берилган овозлар сони бўйича устунлик қилаётган бўлса ҳам, ҳали сайловларда ўзини ғолиб деб эълон қилгани йўқ.
«Биз гарчи рақамлар шуни кўрсатиб турган бўлса ҳам ғалаба ҳақида узил-кесил эълон қилишга шошилмаймиз», – деган Байден Делавэр штатидаги Уилмингтон университетида қилган чиқишида.
АҚШ собиқ вице-президенти бир сутка аввал Трампдан Жоржия ва Пенсильвания каби асосий штатларда ортда қолгани, кейинчалик ундан ўзиб кетганини эслатган. Аризона ҳамда Невадада ҳам шундай ҳолатлар кузатилган.
«Биз сайловчиларнинг яна 300 дан ортиқ овозини тўплаб, пойгада ғолиб чиқмоқчимиз. Баҳсда яққол устунлик билан ғалаба қозонишимиз зарур, ортимизда мамлакат турибди», – деган Байден.
Шунингдек у овозларнинг ҳисоб-китоб қилиниши тўхтатилишига йўл қўймаслигини айтган.
«Менга кимнинг ҳисоб-китобни тўхтатишга уринаётганининг фарқи йўқ. Бунинг содир бўлишига йўл қўймайман», – деган демократлар номзоди.
АҚШ вице-президентлигига номзод Камала Харрис ҳам Байден нутқ сўзлаган вақтда унинг ёнида турган, бироқ у минбарда гапирмаган.
АҚШ президентлиги учун сайловлар 3 ноябрда бўлиб ўтган, лекин овозларнинг ҳисоб-китоби бўйича якуний натижалар ҳанузгача эълон қилинмаяпти. Чунки бу сафарги сайловларда пандемия сабаб бюллетенлар почта орқали сайловчиларга юборилган эди.
Fox News телеканалининг прогнози бўйича Байден аллақачон 270 та овоз керак бўлган вазиятда 264 та овоз олишга улгурган, Трамп эса 214 та овоз олмоқда. Пенсильвания, Жоржия ва Невадада ҳали Байден ғолиб дея эълон қилинмаган, бироқ унинг устунлиги борган сари ошиб бормоқда.
6 ноябрда сайлов комиссиясига келиб тушган бюллетенлар ҳисоб-китобида демократлар номзоди аввал Трамп устунликка эга бўлган бир қатор асосий штатларда етакчиликка чиққан. Амалдаги президент ва унинг тарафдорлари овозларнинг қалбакилаштирилгани ҳақида гапирмоқда ва ғалабани суд орқали қўлга киритишни кўзлаган. Европада хавфсизлик ва ҳамкорлик ташкилоти Америка президенти сайловлари чоғида қоидабузарликлар аниқланмаганини маълум қилган.
Изоҳ (0)