Ортда қолган бир сутка ичида Россияда 7 ноябрь ҳолатига кўра, коронавирус юқтириб олиш билан боғлиқ 20 396 та ҳолат қайд этилди. Бу ҳақда коронавирусга қарши тезкор федерал штаб хабар қилган.
Бир кун аввал Россияда касалланиш бўйича 20 582 та ҳолат аниқлангани ва пандемия бошланганидан бери кузатилган суткалик антирекорд янгилангани ҳақида хабар берилганди.
Энг кўп касалланиш ҳолатлари Москва (сутка давомида 5829 та) ва Санкт-Петербургда (бир сутка ичида 1258 та) кузатилган.
Россияда COVID-19 пандемияси бошлаганидан бери жами 1 753 836 та касалланиш ҳолати қайд этилган.
Ортда қолган бир сутка давомида 364 киши инфекция асоратлари оқибатида вафот этган. Россияда коронавирус инфекцияси тарқала бошлаганидан буён жами 30 251 киши касаллик ва унинг асоратлари туфайли ҳаётдан кўз юмган.
1 312 927 нафар бемор касалликдан тузалган, соғайиш бўйича суткалик кўрсаткич 16 803 нафарни ташкил қилади.
Россияда бир суткада 550 мингта тест олинган (бир кун аввал ушбу рақам 524 мингтани ташкил қилган), пандемия бошланганидан бери 64 миллионта лаборатор тестлар амалга оширилган, дейилади Роспотребнадзор хабарида.
«Роспотребнадзор» раҳбари Анна Попова ўзи имзолаган қарор билан 28 октябрдан Россия фуқароларига одамлар оммавий тўпланадиган жойларда, транспортда, автомобиль тураргоҳларида ва лифтларда ҳимоя ниқобларини тақиш мажбурий деб белгиланган. Транспортда, таксиларда, дўконларда, ресторанларда ва театрларда дезинфекция режими кучайтирилган.
Россиялик вирусолог, профессор Виктор Зуевнинг айтишича, мамлакатда эпидемиологик вазият 2021 йил ёзида барқарорлашади. «Вектор» вирусология ва биотехнология давлат илмий маркази бош директори ўринбосари Александр Агафоновнинг фикрича, коронавирус инфекцияси устидан назоратни вакцина ёрдамида ўрнатиш мумкин.
Изоҳ (0)