Францияда ўтган бир сутка ичида яна 60,4 мингдан ортиқ одамда коронавирус тасдиқланди. Бу мамлакатда пандемия бошланганидан буён қайд этилган энг юқори кўрсаткич ҳисобланади, деб хабар беради «Интерфакс».
Мамлакатда рекорд кўрсаткич иккинчи кун кетма-кет қайд этилмоқда. Бундан олдинги бир сутка ичида Францияда 58 мингдан ортиқ одамда COVID-19 аниқланганди.
Шунингдек, бир сутка ичида мамлакатда коронавирусдан 828 киши вафот этган.
Францияда пандемия бошланганидан буён 1,5 миллиондан ортиқ одамда COVID-19 қайд этилган, қарийб 40 минг бемор вирус қурбонига айланган.
Аввалроқ карантин ҳақида мамлакат президенти Эммануэль Макрон эълон қилган эди. У оммавий тадбирлар бекор қилиниши, кўп сонли одамлар тўпланадиган жойлар, хусусан, бар ва ресторанлар ёпилиши, бунинг имконияти бўлган барча корхоналарда масофадан ишлаш формати жорий этилишини айтганди. Шундан сўнг 30 октябрдан 1 декабргача умумий карантин жорий қилинди. Улгуржи савдо муассасалари, мактаблар ва мактабгача таълим муассасалари, мактабдан ташқари машғулотлар ўтказувчи муассасалар, меҳмонхоналар, барча соғлиқни сақлаш муассасалари, жамоат транспорти ўз ишини давом эттиради.
6 ноябрдан эса Парижда COVID-19 туфайли тунда озиқ-овқат етказиб бериш ва спиртли ичимликлар сотиб олиш тақиқланди.
Изоҳ (0)