Россияда 6 ноябрь тонгига кўра, коронавирусга чалиниш билан боғлиқ 20 582 та ҳолат қайд этилди, деб хабар бермоқда Meduza коронавирусга қарши курашиш штабига таяниб. Бу кунлик касалланишлар сони ортиши бўйича янги рекорд.
Сутка давомида энг кўп касалланганлар Москва (+6253), Санкт-Петербург (+1171) шаҳарлари, Москва (+605) ва Нижегород вилоятларида (+431) қайд этилган.
Мамлакатда коронавирусга чалинганларнинг умумий сони 1 733 440 кишига етди.Сутка давомида инфекциядан 378 киши, умумий ҳисобда эса 29 887 киши вафот этган. Соғайганлар сони 1 296 124 нафарни ташкил этмоқда, шулардан 16 955 нафари сўнгги бир кеча-кундузда тузалиб чиққан.
«Роспотребнадзор» маълумотларига кўра, Россияда коронавирусни аниқлаш бўйича сўнгги бир кеча кундузда 524 мингта, умумий ҳисобда эса 63,5 миллионта тест ўтказилган.
Эслатиб ўтамиз, бундан аввал Россияда сутка давомида COVID-19 қайд этилганлар сони қаторасига икки кун 19 минг кишидан ортиқ бўлганди.
«Роспотребнадзор» раҳбари Анна Попова ўзи имзолаган қарор билан 28 октябрдан Россия фуқароларига одамлар оммавий тўпланадиган жойларда, транспортда, автомобиль тураргоҳларида ва лифтларда ҳимоя ниқобларини тақиш мажбурий деб белгиланди. Транспортда, таксиларда, дўконларда, ресторанларда ва театрларда дезинфекция режими кучайтирилади.
Россиялик вирусолог, профессор Виктор Зуевнинг айтишича, мамлакатда эпидемиологик вазият 2021 йил ёзида барқарорлашади. «Вектор» вирусология ва биотехнология давлат илмий маркази бош директори ўринбосари Александр Агафоновнинг фикрича, коронавирус инфекцияси устидан назоратни вакцина ёрдамида ўрнатиш мумкин.
Изоҳ (0)