Жаҳон соғлиқни сақлаш ташкилоти дунё ҳамжамиятини янги пандемияга тайёрланишга чақирди. Бу ҳақда ташкилотнинг Жаҳон соғлиқни сақлаш ассамблеяси 73-сессиясининг телеконференцияси арафасида тарқатилган баёнотида маълум қилинган, деб ёзмоқда «Ведомости».
«Жаҳон соғлиқни сақлаш ташкилоти инсоният янги пандемияга тайёргарлик билан шуғулланиши керак, деб ҳисоблайди», — дейилади баёнотда. Ташкилот бу мавзуни форумдаги асосий мавзулардан бири сифатида кўриб чиқмоқда.
Маълум қилинишича, 73-сессияда «соғлиқни сақлаш соҳасидаги шошилинч ҳолатларга тайёргарликни кучайтириш ҳақида»ги резолюцияни қабул қилиш режалаштирилмоқда. Ташкилот мамлакатларга фавқулодда вазиятларга тайёрланишни яхшилашга олий сиёсий даражада устунлик беришга чақириқ билан мурожаат қилмоқда.
ЖССТ томонидан қайд этилишича, соғлиқни сақлаш тизимининг инфратузилмаси мустаҳкам ва фавқулодда вазиятларга тайёр бўлган мамлакатлар коронавирус тарқалиши билан боғлиқ вазиятни тез тўхтатиш ва назоратга олишга муваффақ бўлган.
ЖССТнинг Россиядаги вакили Мелита Вуйнович 3 ноябрь куни айни пайтда коронавирус пандемияси дунёда жуда оғир вазиятга эканлигини маълум қилган. Унинг сўзларига кўра, кейинги бир неча ой жуда оғир бўлади, баъзи мамлакатлар жуда оғир ҳолатда. ЖССТ вакилининг қўшимча қилишича, коронавирус билан касалланиш тезлашишда давом этмоқда, бироқ сўнгги пайтларда вирус оқибатида юзага келаётган янги ўлимларнинг сони барқарорлашган.
Изоҳ (0)