Ўзбекистонда 2025/2026-ўқув йилида тўлов-контракт миқдори оширилмайди.

Ҳуқуқшунос Хушнудбек Худойбердиевнинг ёзишича, бу масалада Олий таълим вазирлигининг масъуллари билан боғланганида, улар ушбу маълумотни тасдиқлади.
Тез орада талабалар учун янги ўқув йилига онлайн шартнома олиш бошланади, шартномада ўтган йили тасдиқланган суммалар акс этади. Ўтган йили тўлов-контрактлар миқдори ҳақидаги Давлат қабул комиссиясининг қарори “2024/2025-ўқув йилида қуйидаги миқдорлар тасдиқлансин” деган мазмунда чиққан эди. Жорий йилда янги миқдорлар тасдиқланмайди, демак, юридик жиҳатдан ўтган йили тасдиқланган миқдорлар амал қилишда давом этаверади.
Қоидага кўра, молиявий мустақиллик берилган олийгоҳлар тўлов-контракт миқдорларини ошириш ёки эскича қолдириш масаласини ўзи ҳал қилади.
Июль ойининг ўрталарида янги ўқув йилидан тўлов-контракт миқдори 10—12 фоиз ошиши кутилаётгани ҳақида хабарлар тарқалганди. Олий таълим, фан ва инновациялар вазирлиги матбуот котиби Назокат Абдуқундузова “Дарё” сўровига жавобан бугунги кунда вазирлик томонидан бу масала кўриб чиқилаётганини, мазкур масала бўйича барча маълумотлар вазирликнинг расмий ахборот каналлари орқали эълон қилинишини маълум қилганди.
2024/2025-ўқув йили учун тўлов-контракт миқдорлари 2024 йилнинг июль ойи охирида тасдиқланганди. Унда контракт миқдори ўтган ўқув йилига нисбатан 15 фоизга ошганди. Август ойида эса суперконтракт миқдорлари тасдиқланганди.
Изоҳ (0)