Ўзбекистон бош вазири Абдулла Арипов 2 ноябрь куни Қозоғистон бош вазири ўринбосари Роман Скляр бошчилигидаги ҳукумат делегацияси вакилларини қабул қилди. Бу ҳақда Ўзбекистон ҳукумати матбуот хизмати хабар берди.
Таъкидланишича, учрашувда Олий ва юқори даражада эришилган келишувларнинг жорий ҳолати ва истиқболи муҳокама қилиниб, Ўзбекистон—Қозоғистон муносабатларининг долзарб масалалари кўриб чиқилган.
«Яхши қўшничилик, стратегик шериклик ва кўп қиррали ҳамкорликни янада мустаҳкамлаш, савдо-иқтисодий, тиббиёт, таълим, транспорт ва логистика соҳалари бўйича янги истиқболли лойиҳаларни биргаликда амалга ошириш юзасидан ўзаро фикр алмашилди», — дейилади хабарда.
«Ўзбекистон биз учун минтақадаги асосий савдо шеригимиз. 2020 йилда ўзаро товар алмашиш ҳажмини 5 миллиард долларга етказиш режалаштирилган эди, бироқ пандемия сабаб буни амалга ошириш мушкул. 9 ой давомида ўзаро савдо ҳажмининг пасайиши 16,5 фоизни ташкил этди. Биз томондан амалга оширилаётган экспорт кам фоизларда қисқарган бўлса-да, Ўзбекистон импорти 40 фоизга қисқариб кетди», — деб ёзади Қозоғистон Савдо ва интеграция вазири Бахит Султонов ўзининг Facebook’даги саҳифасига.
Бахит Султонов Ўзбекистондаги ҳамкасбларига Қозоғистон томонидан ўзбек бозорига етказиб берилиши мумкин бўлган турли трубалар, металлопрокат, автомобиллар, кимёвий ва нефть кимёси маҳсулотлари, машинасозлик, фармацевтика ва озиқ-овқат саноати каби яна 64 та товар позицияларини таклиф этган.
Вазирнинг таъкидлашича, Қозоғистон «нафақат савдо қилишни, балки ташқи бозорларга чиқишда ҳамкорликни йўлга қўйишни ҳам хоҳламоқда». Шу сабабли икки мамлакат ҳам Халқаро савдо-иқтисодий ҳамкорлик марказини (ХСИҲМ) яратиш ташаббусини илгари сурган. Қозоғистон ХСИҲМга нафақат инфратузилмага эга трансчегаравий улгуржи ва чакана савдо объекти сифатида, балки Евросиё товарлари алмашинуви тизимининг муҳим савдо-логистика маркази сифатида қарамоқда. Улгуржи тарқатиш марказлари ва Ўзбекистоннинг агро-логистика марказлари ҳам ушбу йирик тизимнинг таркибий қисмига айланишга мўлжалланган.
«Умуман олганда, барча чегара хизматларининг ишини Аҳолига хизмат кўрсатиш ягона дарчалари принципи бўйича марказлаштириш тажрибасини ишлаб чиқиш керак», — дейди Бахит Султонов.
Савдо ва интеграция вазири, шунингдек, томонлар «тўсиқларни ечиш» масаласини ҳам муҳокама қилганини билдирган.
«Ҳамкасблар билан Тошкентнинг 2009 йил 20 ноябрдаги МДҲдаги товарлар ишлаб чиқарилган мамлакатни аниқлаш қоидаларига қўшилиш, Ўзбекистоннинг акциз сиёсатини либераллаштириш жараёни ва Ўзбекистон бозорида Қозоғистон брендларидан фойдаланган ҳолда сохта ун маҳсулотларининг тез-тез пайдо бўлиб туриши масалалари ҳақида гаплашдик», — дейди Бахит Султонов.
2020 йил сентябрь ҳолатига кўра, Ўзбекистоннинг ташқи савдо айланмаси Хитой (16,8 фоиз) ва Россиядан (14,8 фоиз) кейин Қозоғистон ҳисобига тўғри келади — 7,3 фоиз ёки 2 миллиард доллардан ортиқроқ.
Изоҳ (0)