Тошкентда эшакни Spark’га боғлаб, судраб кетган ҳайдовчининг шахси аниқланди. Бу ҳақда Telegram’даги «Ekologuz» канали хабар берди.
Ижтимоий тармоқларда Тошкентда ҳайдовчи эшакни Spark’га боғлаб, судраб кетаётгани тасвирланган видео тарқалди. Ушбу ҳолатни ён-атрофда транспорт воситасини бошқариб келаётган ҳайдовчилар кўриб қолган ва суратга олган. Воқеага гувоҳ бўлганлардан бири телефон камерасига тасвирга олинган видеони ижтимоий тармоққа жойлаган. Тармоқ кузатувчиси бўлган аёл бу видеони «Меҳр ва оқибат» жониворларни ҳимоя қилиш жамияти нодавлат ташкилотига юборган.
«Меҳр ва оқибат» ҳайвонларни ҳимоя қилиш жамияти ушбу аянчли ҳолат бўйича суриштирув олиб боришни сўраб, Тошкент шаҳар ИИББга мурожаат қилган.
Таъкидланишича, ҳозирда жониворга азоб берган ҳайдовчининг шахси аниқланган, суриштирув ишлари олиб борилмоқда.
Маълумот учун, жониворларга нисбатан жоҳиллик билан муносабатда бўлиш ҳолатларида айбдорлар Маъмурий жавобгарлик тўғрисидаги кодекснинг 111-моддасига (ҳайвонларга нисбатан шафқатсиз муносабатда бўлиш) мувофиқ жавобгарликка тортилади. Амалдаги Йўл ҳаракати қоидаларида ҳам бунга нисбатан муайян жавобгарлик белгиланган.
Аввалроқ Тошкентда ухлаётган итга қайноқ сув тўккан хавфсизлик ходими ишдан олингани, қўшнисининг мушугини отган шахс жавобгарликка тортилгани, шунингдек, Самарқандда ит ва мушукларни заҳарлаб ўлдирган мансабдор шахслар эгаллаб турган лавозимларидан озод этилгани тўғрисида хабар берилганди.
Изоҳ (0)