RM Sotheby’s аукциони орқали Toyota тарихидаги энг қиммат моделлардан бири сотилди. Америкалик пойгачи Отто Линтонга тегишли бўлган 53 ёшли ноёб 2000GТ купе 912 минг долларга харид қилинган, деб хабар беради Motor.
Toyota 2000GТ япон маркасининг конвейридан бозорга чиққан спорт автомобиллари орасидаги биринчи модель ҳисобланади. Model Yаmaha муҳандислари билан ҳамкорликда яратилган бўлиб, унинг кузови суйри шаклда, шунингдек, 150 от кучига эга олти цилиндрли Toyota Crown серияли двигателига эга. Модификацияга учраган мотор беш поғонали механик узатмалар қутиси ёрдамида бошқарилади. Купе соатига 100 километр тезликка 10 сонияда эришади, максимал тезлиги — 220 км/соат.
1967 йилдан 1970 йилга қадар япониялик мутахассислар 2000ГT спорткаридан жами 351 нусха йиғган. Улардан 62 тасида рул чап тарафда жойлашган ва купелар АҚШга жўнатилган. Шу каби нусхалардан бири аукцион орқали сотувга қўйилган. Спорткарнинг биринчи эгаси автопойгачи Отто Линтон бўлиб, у 30 йил давомида ушбу машинани бошқарган. Модель узоқ вақт Япониядаги энг тезкор машина бўлиб келган ва у Jaguar E-Тype, Porsche 911 ва Chevrolet Corvette’дан ҳам қимматроқ турган.
Машинанинг сўнгги эгаси 2010 йилларда комплекс реставрацияни амалга оширган: қизил кузов ва қора чарм билан қопланган салон дастлабки ҳолатига келтирилган. Купе 912 минг долларга сотилган бўлиб, у Toyota тарихидаги энг қиммат автомобиллардан бирига айланган.
Аввалроқ Россияда Porsche’нинг дунёдаги илк спорткарларидан бири сотувга қўйилгани тўғрисида хабар берилганди.
Изоҳ (0)