Ferrari фирмаси ўзининг мижози — дизайнер Филипп Плейндан Instagram’да компания обрўсини туширадиган суратларни эълон қилгани учун 300 минг евро ундирди. Ferrari юристларининг фикрича, Плейннинг суратлари Италия брендининг обрўсига путур етказмоқда. Милан суди даъвогарнинг тарафини олган, бироқ Плейн суд қарори устидан шикоят қилишини билдирган, деб ёзади Motor.
Филипп Плейннинг можароли фотосессияси ижтимоий тармоқларга икки йил олдин жойлаштирилган. Немис дизайнери янги оёқ кийим коллекциясининг рекламасида декорация сифатида ёрқин яшил Ferrari 812 Суперфаст суперкаридан фойдаланган.
Автомобиль ишлаб чиқарувчи Плейн ўз кроссовкаларини Ferrari’нинг машҳурлигидан фойдаланиб тарғиб қилаётганидан норози бўлган. Ярим яланғоч моделлар билан тушилган суратлар эса «Италия брендининг қадриятларига хос эмас». Ferrari ушбу суратларни 48 соат ичида ўчириб ташлашни талаб қилган, бироқ Филипп Плейн автогигантнинг хати устидан кулиб қўйган.
Ferrari эътирози юборилганидан 14 ой ўтиб, компания ўз фойдаси учун суд қарорига эришган: Милан суди Филипп Плейндан 300 минг евро ундириш қарорини чиқарган. Шунингдек, моделерга ижтимоий тармоқлардаги саҳифаларидан Ferrari автомобилларига оид барча суратларини ўчириб ташлаш мажбурияти юкланган ва у суд харажатлари учун 25 минг евро тўлаши керак. Акс ҳолда суд Плейндан Ferrari’ни обрўсизлантирадиган ҳар бир сурат учун қўшимча 10 минг доллардан ундиради.
Бунга жавобан Филипп Плейн ўзининг Instagram’даги саҳифасига Ferrari’нинг навбатдаги суратини жойлаб, остига узун изоҳ қолдирган. Моделернинг таъкидлашича, у эътирозларга қўшилмаган ва суд қарори устидан шикоят қилади — кейинги суд 2021 йилнинг баҳорида бўлиб ўтади. Шунингдек, Плейн Ferrari ишқибози эканлигини ва сўнгги йилларда марканинг бешта янги автомобилини сотиб олганини маълум қилган.
Плейн агарда автомобилсозлик компанияси суд қарори билан ундирилган 300 минг долларни хайрия қилса, уни тўлашга розилигини билдирган.
Изоҳ (0)