Тошкент вилояти Юқори Чирчиқ туманида икки нафар пиёдани уриб юбориб, воқеа жойидан қочиб кетган ҳайдовчи ушланди. Бу ҳақда ИИВ ЙҲХББ ахборот хизмати хабар берди.
Маълумотларга кўра, 30 октябрь куни 22:30 ларда Тошкент вилояти Юқори Чирчиқ тумани ИИБ навбатчилик қисмига Чирчиқ—Янгибозор—Ўртасарой ҳудудидан ўтган автомобиль йўлида номаълум транспорт воситаси икки нафар пиёдани уриб юбориб, воқеа жойидан қочиб кетгани тўғрисида хабар келиб тушган.
«Ўғлим билан машинани тўхтатмоқчи эдик, автомобиль чироқларини ўчириб қочиб кетишди», — дейди гувоҳлардан бири. Унинг сўзларига кўра, аварияни оқ рангли «Жигули» автомобили содир этган.
Маълум бўлишича, автомобиль 42 ёшли Наргиза исмли аёл ва 44 ёшли Анвар исмли эркакни уриб юборган.Пиёдалардан бири олинган тан жароҳатлари оқибатида ҳодиса жойида, иккинчиси эса шифохонада вафот этган.
Олиб борилган қидирув ишлари давомида 31 октябрь куни аварияни содир этган «ВАЗ-21013» автомобили ва унинг ҳайдовчиси топилган. «Қарама-қарши тарафдан машина келаётган эди, чироқлар ёруғидан кўзларим қамашиб кетди. Қасддан қилганим йўқ. Вафот этган киши йўлимга чиқиб қолди», — дейди ҳайдовчи.
Ҳолат юзасидан туман ИИБ ҳузуридаги Тергов бўлими томонидан Жиноят кодексининг тегишли моддалари билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ Сурхондарёда ўзига тегишли бўлмаган машинани бошқарган ҳайдовчи икки кишининг ўлимига сабабчи бўлгани тўғрисида хабар берилганди.
Изоҳ (0)