Ўзбекистонда энг қиммат ва арзон палов қаерда тайёрланаётгани маълум қилинди

Давлат статистика қўмитаси Ўзбекистон вилоят марказий ҳудудлари кесимида тайёр паловнинг ўртача нархлари тўғрисида маълумот берди.

Қўмита томонидан мамлакатнинг марказий ҳудудларидаги умумий овқатланиш муассасалари (ош марказлари)да кузатув ўтказилди.

Кузатув натижалари бўйича паловнинг ўртача нархлари қуйидаги кўринишга эга бўлди:

Маълум қилинишича, республикадаги энг қиммат палов октябрь ойида Тошкент шаҳрида тайёрланган. Пойтахтда 1 порция паловнинг ўртача нархи 18800 сўмни ташкил қилган. Энг арзон палов эса Қорақалпоғистонда тайёрланган. Унга кўра, 1 порция тайёр палов ўртача 13 833 сўмга сотилган.

Қайд этилишича, нархларни рўйхатга олувчи томонидан кузатув ўтказилган кун ва вақтдаги нарх-наво қайд этилиб, бунда вақт ва жойига қараб нархлар ўзгариб туради.

Мазкур маълумотларнинг шаклланиши жараёнида фақатгина танлаб олинган умумий овқатланиш муассасалари (ош марказлари)даги паловнинг ўртача нархлари ҳисобга олинган бўлиб, ресторан ва чойхоналардаги нархлар инобатга олинмаган.

Аввалроқ энг арзон гўшт қайси бозорларда сотилаётгани маълум қилинганди.