Энергетика вазирлиги автомобилларга газ қуйиш компрессор шохобчаларига (АГҚКШ) газ етказиб бериш шартлари ҳозирда кўриб чиқилаётганлигини маълум қилди. Таъкидланишича, 1 ноябрдан бошлаб АГҚКШнинг иш тартибига ҳозирча ҳеч қандай ўзгартириш киритилмаган. Бу ҳақда вазирлик матбуот хизмати хабар берди.
Аввалроқ Тошкент шаҳридаги 54 та газ тақсимлаш станцияларида янги иш жадвали жорий этилиши ва навбатма-навбат (бирданига эмас), ҳар уч кунда бир марта соат 19:00 дан 07:00 га қадар газ таъминотини тўхтатиб туриш режалаштирилгани тўғрисида хабар берилганди.
Маълум қилинишича, ушбу чоралар аҳоли ва ижтимоий соҳа объектларини узлуксиз табиий газ билан таъминлашга қаратилган. Бунга сабаб истеъмолнинг юқори («пик») соатларида ёқилғи қуйиш шохобчаларидаги газ истеъмоли туфайли босим камайиб кетади.
«Ҳозирги кунда ушбу чекловчи чораларни қўллаш механизми қайта кўриб чиқилмоқда ва қабул қилинган хулосалар ҳақида ўз вақтида маълумот берилади», – дейилади вазирлик хабарида.
Эслатиб ўтамиз, олдинроқ Тошкентдаги тадбиркорлар газ таъминоти органи ходимларидан 1 ноябрдан бошлаб газ узатилиши ўчириб қўйилиши тўғрисида огоҳлантириш олаётгани маълум бўлганди. Энергетика вазирлиги табиий газдан фойдаланишига доир бу каби чекловларни «зарур чора» деб атаган.
Изоҳ (0)