Октябрь ойида истеъмол нархлари ва тарифларининг ўртача даражаси бир ой ичида 1,4 фоизга ошди. Бу ҳақда Ўзбекистон Давлат статистика қўмитаси томонидан тақдим этилган маълумотларда келтирилган. Январь—октябрь ойлари давомида истеъмол бозоридаги нархлар ва тарифлар ўртача 7,8 фоизга ошган.
Октябрь ойида озиқ-овқат маҳсулотлари ўртача 2,3 фоизга, ноозиқ-овқат маҳсулотлари — 0,8 фоизга, хизматлар 0,7 фоизга қимматлашган.
Расмий статистикага кўра, октябрь ойида гўшт, парранда гўшти ва балиқ нархи сентябрга нисбатан 0,7 фоизга кўтарилган. Тухум — 17,7 фоиз, шакар — 8,6 фоиз, мева-сабзавотлар эса 3,2 фоиз қимматлашган.
Қайд этилишича, шакар ва гўшт нархи йил бошидан бери 15 фоизга ошган. Хусусан, суяксиз мол гўшти баҳоси 10 ой ичида 18,2 фоизга кўтарилган.
Январь—октябрь ойларида пахта ёғи 24,2 фоизга (октябрда – 13,6 фоиз), кунгабоқар ёғи 23,9 фоиз (октябрда – 11,2 фоиз) , сариёғ 11,1 фоиз (октябрда – 1,6 фоиз), маргарин 9,7 фоизга (октябрда – 1 фоиз) қимматлашган.
Ой давомида аҳолига кўрсатиладиган пуллик хизматлар тарифи 0,7 фоизга кўтарилган. Бунда етакчилик йўловчи транспортлари хизматига тегишли бўлиб, уларнинг нархи ой давомида 1,8 фоизга қимматлашган, хусусан, ҳаво хизматлари — 5,2 фоизга, автомобиль — 1,4 фоизга, темир йўл — 0,2 фоизга қимматлашган.
Умумий ҳисобда январь—октябрь ойлари давомида тарифларнинг ошиши мактабгача таълим ташкилотлари (15,2 фоиз), дам олиш хизматлари (10 фоиз), йўловчи транспорти (9,9 фоиз) ва маиший хизматларга (9,7 фоиз) тегишли.
Эслатиб ўтамиз, Ўзбекистонда йиллик инфляция даражаси сентябрь ойида 11,7 фоизни ташкил этган эди.
Изоҳ (0)