Ўзбекистонда январь—сентябрь ойларида нақд пул айланмаси ҳажми 248,5 триллион сўмни ташкил этди. Бу ҳақда Марказий банкнинг нақд пул муомаласи бўйича қисқача шарҳида маълум қилинган.
Маълумотларга кўра, 2020 йилда банклар орқали нақд пул айланмалари динамикаси мамлакатдаги иқтисодий-ижтимоий ҳолатдан келиб чиқиб, жумладан, пандемия шароитида жорий этилган карантин даврида иқтисодий фаолликнинг пасайиши ва карантиндан сўнг қайта жонланиши таъсирида шаклланмоқда.
2020 йилнинг январь—сентябрь ойларида нақд пул айланмаси ҳажми 248,5 триллион сўмни ташкил этган ҳолда 2019 йилнинг мос даврига нисбатан 27,3 фоизга ошган.
«Жумладан, банклар кассаларига нақд пул тушумлари 122,3 триллион сўмни, ўз навбатида, чиқим қилинган нақд пуллар 126,2 триллион сўмни ташкил этди», — дейилади хабарда.
2020 йилнинг январь—сентябрь ойларида банк карталарига жами 123,9 триллион сўмлик маблағлар келиб тушиб, ушбу даврда банк карталаридаги 43,4 триллион сўмлик (35 фоиз) маблағлар аҳоли томонидан нақдлаштириб олинган.
Аввалроқ Ўзбекистонга тўққиз ой давомида юборилган халқаро пул ўтказмалари ҳажми 4,3 миллиард долларни ташкил этгани тўғрисида хабар берилганди.
Изоҳ (0)