Наманганда ҳокимларнинг хотин-қизлар масалалари бўйича маслаҳатчилари ва шаҳар-туман ҳокимликлари ахборот хизматлари раҳбарларига хизмат автомобиллари топширилди. Бу ҳақда «Дарё» мухбири Азизбек Абдувалиев хабар бермоқда.
Хотин-қизлар масалалари бўйича маслаҳатчиларга Nexia-3, ахборот хизмати раҳбарларига эса Spark машиналари тақдим этилди.
«Бу икки тизим олдига бугунги кунда ниҳоятда долзарб масалалар қўйилган. Хотин-қизлар бўйича маслаҳатчилар белгиланган вазифалар, хусусан, аёллар дафтарини тўлақонли шакллантиришга алоҳида эътибор қаратишлари, ахборот хизматлари эса ҳудудларда рўй бераётган воқеа-янгиликларни тезкорлик билан ёритиб боришлари, журналист ва блогерлар билан ҳамкорликни узвий йўлга қўйишлари зарур», — деди тадбирда иштирок этган вилоят ҳокими Шавкатжон Абдураззоқов.
Маълумот учун, Наманганда ҳокимликлар ахборот хизмати раҳбарлари маошига устама маблағлари тўлаш йўлга қўйилди. Йил охирига қадар уларга қўшимча штат бирликлари ажратиш ва замонавий фото-видео ускуналар билан таъминлаш режалаштирилмоқда.
Изоҳ (0)