Андижон ва Самарқанд вилоятларидаги мактабгача таълим ташкилотлари куз-қиш мавсумига тайёргарлик чоғида тарбиячи аёллар томонидан сифатсиз кўмирдан қўлбола брикет (таппи) тайёрлаётган жараёни акс этган фотосуратлар ижтимоий тармоқларда тарқалиб, кенг муҳокамага сабаб бўлганди. «Gazeta.uz»нинг ёзишича, ушбу масалага Мактабгача таълим вазирлиги ойдинлик киритди.
«Ушбу ҳолат Самарқанд вилояти Тойлоқ туманидаги 30-сонли мактабгача таълим муассасасида бўлган. Ушбу муассасага 11 тонна кўмир келтирилган. Ана шу кўмирнинг 400−500 килограми майдаланган, сифатсиз кўмир шаклида бўлган ва шу сабабли ходимлар томонидан брикет тайёрланган. Мактабгача таълим муассасаси директори кўмирни увол қилмаслик мақсадида муассаса ходималари ўз ихтиёрлари билан қўлбола брикетларни ясагани маълум бўлди», — деган Мактабгача таълим вазири ўринбосари Шодиёр Маматқулов «Мактабгача таълим ташкилотларида куз-қиш мавсумига тайёргарлик, сифатли кўмир билан таъминлашдаги муаммолар» мавзусида 31 октябрь куни ўтказилган матбуот анжуманида.
Маълумот ўрнида, вилоят мактабгача таълим бошқармаси томонидан «Ўзбеккўмир» АЖнинг Самарқанд кўмир етказиб берувчи филиалидан 964 миллион сўмга 894 тонна кўмир ҳамда 1686 тонна кўмир брикет харид қилинган.
Андижон вилоятидаги мактабгача таълим муассасалари учун 2020−2021 йил куз-қиш мавсуми учун жами 19,989 тонна кўмир ва брикет маҳсулотларини етказиб бериш кўзда тутилган. Шундан 5771 тонна кўмир ҳамда 14,718 тонна кўмир-брикет ёқилғиси олиш режалаштирилган бўлиб, ҳозирга қадар ушбу кўрсаткичнинг 74 фоизи бажарилган.
«Kun.uz»нинг ёзишича, «Ўзбеккўмир» АЖ бош геологи Эркин Жўраев кўмирлар сифатли бўлса, нега жойларга етказилганда сифати ўзгариб қолаётганига изоҳ берган.
«Ангрен кўмир конига тегишли бўлган қўнғир кўмири қаттиқлик даражаси бўйича 4-шкалада, бу жудаям юмшоқ. Кўмир сифатига таъсир қилувчи омиллардан биринчиси бу – қуёш ҳамда қор, ёмғирнинг таъсири ва бугунги кунда кўмирни сақлаш тартиби бўляпти. Биз кўмир конидан юкланган маҳсулотни кўмир жамланмасига элтамиз, у ердан лабораториядан ўтказилади ва шу тариқа ҳар бир вагондаги маҳсулотга сифат гувоҳномаси берилади. Сифат гувоҳномасида кўмирнинг маркаси, ўлчами, намлиги ҳамда калорияси тўғрисидаги маълумотлар тақдим қилинади. Ҳамда биздан жойларга ўша марка, ўша сифатдаги кўмир чиқиб кетади.
Кўмирнинг сифати яхши. Сифатсиз дейилаётган кўмир бу — майдаланган кўмир. Уни лабораторияда текширсангиз, сифатли бўлиб чиқади. Кўмир истеъмолчининг қўлига етиб боргунича бир неча босқичдан ўтгани боис майдаланиб кетяпти ва сифатсиз кўринишга келяпти.
«Аслида биздан, ‘Ўзбеккўмир’ АЖдан, Ангрен кўмир конидан чиқаётган кўмир маҳсулоти ГОСТ талабларига жавоб беряпти», — деган у.
У масаланинг ечими ҳақида ҳам гапирган. «Бирдан-бир йўли — жойларга етказилган кўмирдан сифатли брикет ишлаб чиқарилиб, етказилса, мақсадга мувофиқ бўлади», — дед таъкидлаган Эркин Жўраев.
«Ўзбеккўмир» АЖ бош директори ўринбосари Эркин Якубов эса сифатсиз кўмирлар учун ким жавобгарлигига аниқлик киритди.
«Кўмирни омбордан олган пайтда муассаса раҳбарларига маҳсулотнинг сертификати берилади. Ўша сертификат бўйича олиш лозим. Агар сифатсиз бўлса, олмаслик керак. Чунки брикетлар ишлаб чиқарилгандан кейин уч-тўрт кун қуритилиши лозим.Агар брикетни олиб кетишни истамаса, биз бошқа кўмир билан таъминлаймиз. Бу бўйича раҳбариятдан топшириқ олганмиз. Брикетни керакли меъёргача намлигини пасайтириб, кейин беришимиз керак. Олиб кетадиган одам ҳам шундан кейин (брикет қуритилганидан кейин) олиб кетиши керак», — деган у.
Изоҳ (0)