O‘zbekistonda yanvar—sentabr oylarida naqd pul aylanmasi hajmi 248,5 trillion so‘mni tashkil etdi. Bu haqda Markaziy bankning naqd pul muomalasi bo‘yicha qisqacha sharhida ma’lum qilingan.
Ma’lumotlarga ko‘ra, 2020-yilda banklar orqali naqd pul aylanmalari dinamikasi mamlakatdagi iqtisodiy-ijtimoiy holatdan kelib chiqib, jumladan, pandemiya sharoitida joriy etilgan karantin davrida iqtisodiy faollikning pasayishi va karantindan so‘ng qayta jonlanishi ta’sirida shakllanmoqda.
2020-yilning yanvar—sentabr oylarida naqd pul aylanmasi hajmi 248,5 trillion so‘mni tashkil etgan holda 2019-yilning mos davriga nisbatan 27,3 foizga oshgan.
“Jumladan, banklar kassalariga naqd pul tushumlari 122,3 trillion so‘mni, o‘z navbatida, chiqim qilingan naqd pullar 126,2 trillion so‘mni tashkil etdi”, — deyiladi xabarda.
2020-yilning yanvar—sentabr oylarida bank kartalariga jami 123,9 trillion so‘mlik mablag‘lar kelib tushib, ushbu davrda bank kartalaridagi 43,4 trillion so‘mlik (35 foiz) mablag‘lar aholi tomonidan naqdlashtirib olingan.
Avvalroq O‘zbekistonga to‘qqiz oy davomida yuborilgan xalqaro pul o‘tkazmalari hajmi 4,3 milliard dollarni tashkil etgani to‘g‘risida xabar berilgandi.
Izoh (0)