Саудия Арабистонининг Жидда шаҳрида жойлашган Франция консуллиги қўриқчисига ҳужум уюштирилди, жабрланувчи шифохонага ётқизилган. Бу ҳақда мамлакатнинг Саудиядаги дипломатик ваколатхонаси хабар берган.
Қўриқчига маҳаллий аҳоли вакили томонидан пичоқ билан жароҳат етказилган. Унга оғир жароҳат олмаган, дейилади элчихонанинг баёнотида. Қўриқчининг қай тарзда ва нима учун ҳужумга учрагани маълум эмас.
Аввал Франциянинг Ницца шаҳрида пичоқ кўтарган эркак Нотр-Дам базиликаси меҳмонларига ҳужум қилган ва уч кишини пичоқлаб ўлдиргани, Авиньон коммунасида пичоқ кўтарган эркак полициячиларга ҳужум уюштиргани, оқибатда ҳуқуқ-тартибот идораларининг ходимлари уни отиб ташлагани ҳақида хабарлар берилганди.
Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги айрим мамлакатларда Францияда ишлаб чиқарилган маҳсулотларга нисбатан бойкот эълон қилина бошланди.
Мавзуга доир: Ўзбекистон мусулмонлари идораси Муҳаммад (с.а.в) ҳақидаги карикатура атрофида юзага келган баҳсларга муносабат билдирди
Изоҳ (0)