Франциянинг Ницца шаҳрида террорчи одамларга пичоқ билан ҳужум қилди. Уч киши вафот этди

Франциянинг Ницца шаҳрида пичоқ билан қуролланган киши Нотр-Дам базиликаси меҳмонларига ҳужум қилди, дея хабар бермоқда Meduza.

Маълум қилинишича, уч киши ўлдирилган (баъзи маҳаллий ОАВларнинг хабарига кўра, бир аёлнинг боши кесилган), яна бир неча киши жароҳат олган. Le Figaro нашрининг ёзишича, бир аёл базиликанинг ўзида, иккинчиси — унинг ёнидаги кафеда ўлдирилган. У ерда аёл жиноятчидан яширинмоқчи бўлган. Учинчи қурбон эркак киши бўлган.

Гумонланувчи полиция томонидан ушланган. У яраланган ва ҳозир касалхонага жойлаштирилган.

Ҳозирча жиноятчининг шахси ва ҳужум сабаблари ҳақида ҳеч нарса хабар қилинмаган. Ницца шаҳар ҳокими Кристиан Эстросининг таъкидлашича, воқеа террорчилик ҳужуми белгиларига эга. Ички ишлар вазирлиги ҳузурида воқеани текшириш учун вазир Геральд Дарманен бошчилигидаги махсус штаб ташкил этилди.

Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.