Испания суди Россия Каталония мустақиллиги тарафдорларига 10 минг аскар ваъда қилганини айтди. Улар бунга жавобан «Калинка»ни куйлаб берди (видео)

2017 йилдаги Каталония мустақиллиги ҳақидаги референдумнинг ноқонуний молиялаштирилиши бўйича ишни текшираётган барселоналик судья Хоакин Агирре фикрича, Россия ҳудуднинг Испаниядан ажралиши тарафдорларига ҳарбий ва моддий ёрдам таклиф қилган. Бу ҳақда Каталониянинг El Periodica газетаси 28 октябрь куни Каталонияда 21 нафар Каталония мустақиллиги тарафдорларини ҳибсга олишга асос бўлган ордерга таяниб хабар берди, деб ёзади Meduza.

Судья ҳужжатда ёзишича, референдумдан сал аввалроқ Россия Каталонияга 10 минг аскар жўнатишни ва Каталониянинг бутун қарзини тўлашни таклиф қилган. Судья каталониялик сиёсатчи, Каталония собиқ президенти Карлес Пучдемоннинг сафдоши Виктор Терраделяс 2018 йил майида олиб борган иккита телефон суҳбатига асосланиб, шундай хулосага келган.

Суд версиясига кўра, таклиф Терраделяс Михаил Горбачёв даврида шаклланган россияликлар вакиллик гуруҳига Каталониянинг молиявий мустақилликка эришишига имкон берувчи криптовалюта платформасини яратишни муҳокама қилиш учун мурожаат қилган пайтида келиб тушган.

Судья имзолаган ордерда «Кремль ҳукумати қатнашган дезинформация ва беқарорлаштириш стратегияси» ҳақида ҳам айтилади. Ҳужжатда «Россия сегодня» ва РТ бош муҳаррири Маргарита Симонян, Россия Қуролли кучлари бош штаби бошлиғи Валерий Герасимов ва Терраделяснинг ўзи учрашган сиёсатшунос Сергей Марков ҳам тилга олинган.

Судья баёнотидан кейин Каталония мустақиллиги тарафдорлари Барселона кўчаларидан бирига чиқиб, «Калинка» қўшиғини куйлаб берди.

Россиянинг Испаниядаги элчихонаси судьянинг баёнотига ҳазил билан жавоб қилди: «Аскарлар сонига яна иккита нол қўшиш керак ва бу тил бириктиришдаги энг ҳайратланарли нарса: қўшинлар Каталонияда фуқаролар уруши даврида йиғилган ва хавфсиз жойга яшириб қўйилган «Муха» ва «Чато» самолётларида етказилиши керак бўлган».

Аввалроқ El Periodica газетаси ёзганидек, Виктор Терраделяс Каталония раҳбари Карлес Пучдемонга  2017 йилда Москвада ҳукмрон партиядан собиқ депутат ва Кремлга алоқадор сиёсатшунос билан музокаралар олиб борганини айтган. Унда агар Каталония ҳукумати Қримнинг Россияга қўшилганини тан олса, Москва Каталония мустақиллигини тан олишга тайёрлигини маълум қилинган.

2019 йил ноябрида Испаниянинг El Pais газетаси мамлакат ҳуқуқ-тартибот органлари Россия разведка бошқармасининг 2017 йил кузида Каталония ички ишларига эҳтимолий аралашувини текшираётганини хабар қилганди.