Доҳа аэропортида чақалоқ топиб олингач у ерда камида битта авиарейснинг аёл йўловчиларини гинекологик кўрикдан ўтишга мажбур қилишди, деб хабар беради Meduza.
Ҳодиса 2 октябрь куни Қатар пойтахти Доҳадаги Ҳамад халқаро аэропортида юз берган. Аэропорт ходимлари ҳожатхонадан чақалоқ топиб олган. Шундан кейин самолётдан аёл йўловчиларни туширишган. Уларга ҳеч қандай изоҳ бермасдан, тез ёрдам машиналарига ўтирғизишган ва у ерда гинеколог кўригидан ўтказишган.
Нечта аёл кўрикдан ўтгани аниқ эмас, аммо улар орасида Сиднейга йўл олган «Қатар ҳаво йўллари» QR 908 рейсининг йўловчилари бўлгани маълум. Ушбу самолёт йўловчиларидан бири The Guardian нашрига хабар қилишича, йўловчилар тушганидан кейин самолёт яна уч соатча аэропортда турган. Сўнг борт кузатувчилари барча аёлларнинг чиқишини сўраган. Қайтиб келган аёллар хафа ҳолатда бўлган, улардан бири йиғлаган.
Австралияга қайтиб келгач йўловчи аёллардан бири полицияга мурожаат қилган. Таъкидланишича, кўрик жуда қўпол ва тажовузкорона тарзда ўтказилган.
Бундай ҳолатни жинсий зўравонлик деб баҳолаш мумкин, деди Human Rights Watch ҳуқуқни ҳимоя қилиш ташкилоти раҳбарларидан бири, ҳуқуқшунос Хизер Барр. Австралиядаги Amnesty International директори Саманта Клинтуорс воқеани зудлик билан текширишга чақирди.
Австралия ташқи ишлар вазири Мэрис Пэйн мамлакат ҳукумати Қатар ҳукуматидан изоҳ талаб қилганини айтди.
Ўз навбатида Ҳамад аэропорти маъмурияти йўловчиларнинг гинекологик кўрикдан ўтказилганини тўғридан-тўғри тасдиқламади. Баёнотда айтилишича, шифокорлар ҳозиргина кўзи ёриган онанинг саломатлиги юзасидан хавотир билдириб, уни учиб кетгунча топишни сўраган. Таъкидланишича, бола айни пайтда хавфсизликда, аммо унинг онаси топилганича йўқ.
Қатарда никоҳдан ўтмасдан туриб фарзанд кўриш жиноят ҳисобланади. Бунинг учун одатда бир йилга озодликдан маҳрум қилишади. Агар маҳкум мусулмон бўлса, яна 100 дарра қамчи ҳам тайинланади. Агар маҳкум уйланган бўлса, ўлим жазоси тайинланиши мумкин. Никоҳ қурмасдан фарзанд кўрган аёллар эса бир йил муддатга қамалади.
Изоҳ (0)